ಕ್ರೀಸ್ತ್ ರಾಯ್ ಕೊವೆಂತಾಚಿ ಚರಿತ್ರಾ

      ಮೊನ್ಸಿಜೊರ್ ಎಡ್ವಿನ್ ಸಿ. ಪಿಂಟೊ, ರೊಜಾರ್ ಮಾಯೆಚ್ಯಾ ಸೆವಕಿಂಚಾ ಮೆಳಾಚೆ ಘಡ್ಣಾರ್ 1989 oತ್ ಮೇ 27ವೆರ್ ರೊಜಾರ್ ಮಾಯೆಚಾ  ಸಂಸ್ಥ್ಯಾಕ್   ದಿರೆಕ್ತೊರ್ ಜಾವ್ನ್ ಆಯ್ಲೆ. ದುಬ್ಳ್ಯಾಂ ಖಾತಿರ್  ದೂರದೃಷ್ಟಿಚೆಂ ಯಾಜಕ್ ತೆ. ಸಂಸ್ಥ್ಯಾಂತ್ ನಿಸ್ವಾರ್ಥಿ ಸೆವಾ ದೀವ್ನ್ ಆಸ್ಚ್ಯಾ 11 ಭಯ್ಣ್ಯಾಂಚೆರ್ ತಾಂಚಿಂ ದೀಷ್ಟ್ ಘುಂವ್ತಾ. ಪಾಟ್ಲ್ಯಾ ಸಬಾರ್ ವರ್ಸಾಂ ಥಾವ್ನ್  ಸಂಸ್ಥ್ಯಾಕ್   ಸೆವಾ ದೀವ್ನ್ ಆಸ್ಚ್ಯಾ ಆನಿ ಸರ್ವತೋಮುಖ್ ಅಭಿವೃದ್ದಿಚ್ಯಾ ಕಾಮಾಂತ್ ಮೆತೆರ್ ಜಾವ್ನ್ ಆಸ್ಚ್ಯಾ ಹ್ಯಾ ಭಯ್ಣ್ಯಾಂಕ್  ತವಳ್ಚೆ ಮಂಗ್ಳೊರ್ಚೆ ದೊತೊರ್ ಬಾಜಿಲ್ ಡಿಸೋಜ  ಏಕ್ ಭಕ್ತಿಕ್ ಮೇಳ್ ಘಡ್ಚೊ  ಮ್ಹಣ್  ಠಾರಯ್ತಾ . ಹ್ಯಾ ಯೋಜನಾಕ್ ಫಾವೊ ತಿ ತಯಾರಾಯ್ ಕರ್ನ್  ಸಪ್ತೆಂಬರಾಚ್ಯಾ 15 1990ವೆರ್ ಕೊಡ್ಯಾಳ್ಚ್ಯಾ ದು:ಖಿ ಸಾಯ್ಬಿಣೆಚ್ಯಾ ಇಗರ್ಜೆಂತ್  ಗೊವ್ಳಿಬಾಪ್ ಹ್ಯಾ ಮೆಳಾಕ್ '' ರೊಜಾರ್ ಮಾಯೆಚ್ಯಾ ಸೆವಕಿ '' ಮ್ಹಳ್ಳ್ಯಾ ನಾಂವಾಖಾಲ್ ಬುನ್ಯಾದ್ ಘಾಲ್ತಾತ್. 

ಇಕ್ರಾ ಭಯ್ಣಿಂ ಸಂಗಿಂ ವಾಡೊನ್ ಆಯ್ಲೊ ಹೊ ಮೇಳ್ ಪ್ರಸ್ತುತ್ 70 ಭಯ್ಣ್ಯಾ ಸಂಗಿಂ ವಾಡೊನ್ ಉಬೊ  ರಾವ್ಲಾ. ರೊಜಾರ್ ಮಾಯೆಚ್ಯಾ ಸೆವಾಕಿಂಚಿ ಚಡ್ತಾವ್ ಘರಾಂ ಮಂಗ್ಳುರ್ ದಿಯೆಸೆಜಿಂತ್ ಆಸೊನ್ ಥೊಡಿಂ ಘರಾಂ ಲಾಗ್ಶಿಲ್ಯಾ ದಿಯೆಸೆಜಿಂನಿ ಆಸಾತ್. ಏಕ್ ಘರ್ ಯುರೋಪಾಚಾ ಆಸ್ಟ್ರೀಯಾಂತ್ ಸೆವಾ ದೀವ್ನ್ ಆಸಾ. ಸರ್ವ್ ಸೆವಕಿ ಎಕ್ವಟಾನ್  ಮಾಗ್ಣ್ಯಾಂತ್ ಸಂಗಿಂ ಜಿಯೆತಾತ್ ಆನಿ ಫಿರ್ಗಜೆಚ್ಯಾ ಆನಿ ಸಮಾಜೆಚ್ಯಾ ಮಿಸಾಂವಾಂತ್ ಭಾಗ್ ಘೆತಾತ್. ಪ್ರತ್ಯೇಕ್ ಜಾವ್ನ್ ಸಮಾಜ್ ಸೆವೆಚಾ ವಾವ್ರಾಂತ್ ರೊಜಾರ್ ಮಾಯೆಚ್ಯೊ ಸೆವಕಿ ಸೊಮ್ಯಾ ಜೆಜುನ್ ಕೆಲ್ಲ್ಯಾ ಸೆವೆ ವಾವ್ರಾಚೊ ಆನಿ ಮಾಗ್ಣ್ಯಾಚೊ ಅನ್ಬೋಗ್ ವಾಂಟುನ್ ಘೆತಾತ್. ಮೆಳಾಚಿ ಆದ್ಲಿ ಶ್ರೇಷ್ಟ್ ವ್ಹಡಿಲ್ನ್ ಸಿ|ಪ್ರೆಸಿಲ್ಲಾ ಡಿ'ಮೆಲ್ಲೊ , ಹಿಚ್ಯಾ ಆವ್ದೆಂತ್ ಮೆಳಾಚ್ಯಾ ಘಡ್ನಾರಾ  ಸವೆಂ ಸಬಾರ್ ಆಚರ್ಯಾ ಕೆಲ್ಯಾಂತ್. ಮೆಳಾಂತ್ ಭಯ್ಣ್ಯಾಚೊ ಸಂಖೊ ವಾಡೊನ್ ಯೆತಾನಾ ಭಯ್ಣಿಂ ಬಳಾಧಿಕ್ ಜಾವ್ನ್ ಭಾಯ್ಲ್ಯಾ ದಿಯಸೆಜಿಚ್ಯಾ ಫಿರ್ಗಜಾಂನಿಂ ಮಿಸಾಂವಾಚೊ ಫರ್ಮಳ್ ಉದೆಲೊ. ಸಾಮಾಜಿಕ್, ನೈತಿಕ್, ಶೈಕ್ಷಣಿಕ್, ಧಾರ್ಮಿಕ್ ಆನಿ ಸಾಂಸ್ಕತಿಕ್ ಚಟುವಟಿಕ್ಯೊ ವಾಡ್ಲ್ಯೊ. 

ಹಾಂಚೆ ಪೈಕಿ ವಿಟ್ಲಾ ವಾರಾಡ್ಯಾಚಾ ಮಾನೆಲಾ ಗಾಂವ್ಚ್ಯೆ ಕ್ರೀಸ್ತ್ ರಾಯಾಕ್ ಸಮರ್ಪಿಲ್ಲೆಂ ಕೊವೆಂತ್ ಏಕ್ ಜಾವ್ನಾಸಾ. ಹೆಂ ಕೊವೆಂತ್ ದೆವಾದಿನ್  ಮಾ| ಬಾ| ಬಿ. ಯಸ್. ರೇಗೊ ಹಾಣಿಂ ಮೆಳಾಚಾ ವ್ಹಡಿಲಾಂ ಸಂಗಿಂ ಜನವರಿ 17 2010 ವೆರ್ ಪ್ರಾರಂಭ್ ಕೆಲ್ಲೆಂ ಜಾವ್ನಾಸಾ. ಹಾಂಗಾಸರ್ ಪ್ರಸ್ತುತ್ ತೆಗಾಂ ಧರ್ಮ್ ಭಯ್ಣಿಂ ವಸ್ತಿ ಕರ್ನ್ ಆಸಾತ್. ತಿಂ ದಿಸ್ಪೊಡ್ತೆಂ ದೆವಾಚಾ ಉತ್ರಾಚೆರ್ ನಿಯಾಳ್ ಆನಿ ಮಾಗ್ಣೆ ,ಎವ್ಕಾರಿಸ್ತಾಚೆ ಬಲಿದಾನ್ ಆನಿ ಕೊಂತಾಚೆ ಭಕ್ತಿಪಣ್, ಪವಿತ್ರ್ ಸಾಕ್ರಾಮೆಂತಾಕ್ ಆರಾಧಾನ್, ವೈಯುಕ್ತಿಕ್ ಮಾಗ್ಣೆಂ ಕರ್ನ್  ತಾಂಚಾ ಆತ್ಮೀಕ್ ಜಿಣ್ಯೆಚಾ ವಾಡಾವಳಿಕ್ ಗರ್ಜ್ ಆಸ್ಚಿಂ ಸರ್ವ್ ಮಾರ್ಗದರ್ಶನ್,ಶಿಕ್ಷಣ್ ಜೋಡ್ನ್ ಆಸಾತ್, ಹೆಂ ತಾಂಕಾಂ ತಾಂಚೆಂ ಮಿಸಾಂವ್ ಉರ್ಬೇನ್ ಕರುಂಕ್ ಕುಮೊಕ್ ಕರ್ತಾ.  ಸಿ|ಸರಿತಾ ಡಿಸೋಜ ಕೊವೆಂತಾಚಿ ಆನಿ ಇಸ್ಕೊಲಾಚಿ  ವಡಿಲ್ನ್  ಜಾವ್ನ್, ಸಿ| ಪ್ರವಿಟಾ ಡಿಸೋಜ ಇಸ್ಕೊಲಾಂತ್ ಶಿಕ್ಷಕಿ ಜಾವ್ನ್ ಆನಿ ಸಿ| ಸುಶ್ಮಿತಾ ಡಿಸೋಜ ಆಪ್ಲೆ ಡಿಗ್ರಿ ಶಿಕಾಪ್ ಜೋಡ್ನ್ ಆಸಾ. ತಿಂ ಇಗರ್ಜಿಂತ್ ಪಾಸ್ತೊರಲ್ ಸೆವಾ, ತಾಂಚೆಚ್ಚ್ ಕಿಂಡರ್ ಗಾರ್ಟನ್ ಸ್ಕೂಲ್ ಅಸೊನ್ ನೆಣ್ತುಲ್ಯಾ  ಭುಗ್ರ್ಯಾಂಕ್ ಬರ್ಯಾ ಬುನ್ಯಾದಿಚೆ ಶಿಕಾಪ್ ದೀವ್ನ್ ಆಸಾತ್. ಸಾಂಗಾತಾಚ್ಚ್ ಕೃಷೆಚೊ ವಾವ್ರ್‍ಯೀ  ತಿಂ ಕರ್ನ್ ಆಸಾತ್. ತಾಂಚಾ ಮಿಸಾಂವ್  ವಾವ್ರಾಂತ್ ತಿಂ ಉರ್ಬೇನ್ ಆಸೊನ್ ಹೆರಾಂಕ್‍ಯೀ  ತಾಂಚಾ ಜಿಣ್ಯೆ ಮಾರಿಫಾತ್ ಬರಿ ದೇಖ್ ಆನಿ ಮಾರ್ಗಾದರ್ಶನ್ ದೀವ್ನ್ ಆಸಾತ್. ವಾಡ್ಯಾ ಜಮೊತಿಕ್ ಆನಿ ವಾಡ್ಯಾಚಾ ಹರ್ಯೇಕ್ ಕಾರ್ಯಾಂಕ್  ಚುಕಾನಾಸ್ತಾನಾ ತಿಂ ಹಾಜಾರ್ ಜಾತಾತ್ ಆನಿ ಫಾವೊ ತೆಂ ಮಾರ್ಗದರ್ಶನ್ ದೀವ್ನ್ ಆಸಾತ್. ಫಿರ್ಗಜಿಚಾ ಆನಿ ವಾರಾಡ್ಯಾಚಾ ಹರ್ಯೇಕ್ ಚಟುವಾಟಿಕೆನಿಂ ಕ್ರಿಯಾಳ್ ಜಾವ್ನ್ ಭಾಗ್ ಘೆವ್ನ್ ಆಸಾತ್.

ಘರ್ ಭೆಟೊ ಕರ್ನ್ ಲೊಕಾಚೆ ಸುಖ್ ದೂಖ್ ಸಮ್ಜೊನ್ ಘೆತಾತ್. ಇಸ್ಕೊಲಾಂತ್ ನೆಣ್ತುಲ್ಯಾ ಭುಗ್ರ್ಯಾಂಕ್ ತಾಂಚಾ ಬುನ್ಯಾದಿಚೆ ಶಿಕಾಪ್, ಸಾಂಗಾತಾಚ್ಚ್ ಬರಿಂ ಮೌಲ್ಯಾಂ ಶಿಕೊನ್ ಆಸಾತ್. ರಜೆ ವೆಳಾರ್ ವಿಟ್ಲಾ ಆನಿ ಮಾನೆಲಾ ಫಿರ್ಗಜಿಚಾ ಭುಗ್ರ್ಯಾಂಕ್ ಮ್ಯೂಸಿಕ್ ತಶೆಂಚ್ ಲಾಗ್ಶಿಲ್ಯಾ ಗರ್ಜೆವಂತ್ ಭುಗ್ರ್ಯಾಂಕ್ ದಿಸ್ಪೊಡ್ತೆಂ ಟ್ಯೂಶನ್ ಕ್ಲಾಸ್ ಕಾಣ್ಘೆವ್ನ್ ಆಸಾತ್.  ಸಾಂಗಾತಾಚ್ಚ್ ತಾಂಕಾಂ ವೇಳ್ ಆಸ್ತಾನಾ ತಾಂಚಾ ಕೊವೆಂತಾಂತ್ ಸಂಗಿ ಕಾಮಾಕ್ ಆನಿ ಕೃಷೆಚಾ ವಾವ್ರಾಕ್ ಚಡಿತ್ ತಿಂ ಗಮಾನ್ ದಿತಾತ್. ಲ್ಹಾನ್ ಲ್ಹಾನ್ ಸೆವೆ ಮಾರಿಫಾತ್ ಅನ್ಯೇಕ್ ಕ್ರೀಸ್ತ್ ಜಾಂವ್ಕ್ ತಿಂ ಪೆಚಾಡ್ತಾತ್ ಆನಿ ಕ್ರೀಸ್ತಾಚೊ ಪರ್ಜಳ್ ಹೆರಾಂ ಭಾಂವ್ಡಾಂಕ್ ವಾಂಟುಂಕ್ ತಿಂ ಹರ್ ಪ್ರಯತನ್ ಕರ್ತಾತ್.

ಹ್ಯಾ ಆಮ್ಚ್ಯಾ ವತ್ರ್ಯಾ ಮಿಸಾಂವಾಂತ್ ಆಮ್ಚ್ಯಾ ಮೆಳಾಚಿ  ಆತಾಂಚಿ ವ್ಹಡಿಲ್ನ್ ಅತೀ ಮಾನಾದಿಕ್ ಸಿ| ಸುನಿತಾ ಡಿಸೋಜ ಆಮ್ಕಾಂ ಪಾಟಿಂಬೊ ಆನಿ ಮಾರ್ಗದರ್ಶನ್ ದೀವ್ನ್ ಆಸಾ. ತಶೆಂಚ್ ಆಮ್ಕಾಂ ಸದಾಂಚ್ ಉತ್ತೇಜನ್ ಆನಿ ಮಾರ್ಗದರ್ಶನ್ ದಿಂವ್ಚ್ಯಾ ಆಮ್ಚ್ಯಾ ಮಾನೆಲಾ ಫಿರ್ಗಜಿಚಾ ಆದ್ಲ್ಯಾ ಆನಿ ಆತಾಂಚಾ ವಿಗಾರ್ ಬಾಪಾಂಚೊ ಆನಿ ಫಿರ್ಗಜ್‍ಗಾರಾಂಚೊ ತಶೆಂಚ್ ಆಮ್ಕಾಂ ಆಮ್ಚ್ಯಾ ಮಿಸಾಂವಾಂತ್ ಉತ್ತೇಜನ್ ಆನಿ ಸಾಂಗಾತ್ ದಿಂವ್ಚ್ಯಾ ಸರ್ವಾಂಕ್ ಆಮಿ ಆಭಾರಿ ಜಾವ್ನಾಸಾಂವ್. ದೆವಾಚಿಂ ಭರ್ಪೂರ್ ಆಶಿರ್ವಾದಾಂ ತಾಂಚೆಂ ಸವೆಂ ಸದಾಂಚ್ ಆಸೊಂದಿತ್ ಮ್ಹಣ್ ಆಮಿ ಸದಾಂಚ್ ಆಶೆತಾಂವ್ ಆನಿ ಮಾಗ್ತಾಂವ್.