ಕ್ರೀಸ್ತ್ ರಾಯ್ ಫಿರ್ಗಚೆಚಿ ಚರಿತ್ರಾ

      1995 ಚ್ಯಾ ಆದಿಂ ವಿಟ್ಲ ದು:ಖಿ ಸಾಯ್ಭಿಣಿಚಾ ಫಿರ್ಗಜೆಂತ್ ಆಸ್ಚ್ಯಾ  ಸಾತ್ ವಾಡ್ಯಾ ಪಯ್ಕಿಂ ಮನೆಲಾ ಏಕ್ ವಾಡೊ ಜಾವ್ನಾಸ್ಲೊ. ಮನೆಲಾಚ್ಯಾ ಲೊಕಾಂಕ್ ಮಿಸಾಚ್ಯಾ ಬಲಿದಾನಾಂತ್ ಭಾಗ್ ಘೆಂವ್ಕ್ ಲಗ್ಬಗ್ 8 ಕಿ.ಮೀ. ಥಾವ್ನ್ 13 ಕಿ.ಮೀ. ಪರ್ಯಾಂತ್ ಚಲೊನ್ ವಚೊಂಕ್ ಪಡ್ತಾಲೆಂ. 1955 ಇಸ್ವೆಂತ್ ಮಾ| ಬಾ| ಆಲ್ಫೋನ್ಸ್. ಐ. ಕಾಸ್ತೆಲಿನೊ ಮನೆಲಾಂತ್ ಕೊಪೆಲಾ ಖಾತಿರ್ ಏಕ್ ಜಾಗೊ ಘೆಂವ್ಚೊ ಮ್ಹಣ್ ನಿರ್ಧಾರ್ ಘೆತ್ಲೊ. ಸರ್ಕಾರಾಕ್ ಮನವಿ ದಿಲಿ.

ಮಾ| ಬಾ| ಪೀಟರ್ ನಜರೆತ್ ಹಾಣಿ ಮನೆಲಾ ವಾಡ್ಯಾಕ್ ಭೆಟ್ ದಿಲಿಂ. ಭೆಟ್ ದಿಲ್ಲ್ಯಾ ನಜರೆತ್ ಬಾಪಾಂನಿ ವಾಡ್ಯಾಗಾರಾಂಚಿಂ ಪರಿಸ್ಥಿತಿ ಸಮ್ಜೊನ್ ಕಿಸ್ತು ಟೆಲ್ಲಿಸಾಚ್ಯಾ ಘರಾಂತ್ ಮಹಿನ್ಯಾಕ್ ಏಕ್ ಪಾವ್ಟಿಂ ಆಯ್ತಾರಾಚೆಂ ಮಿಸಾಚೆಂ ಬಲಿದಾನ್ ಭೆಟಂವ್ಚಿ ವಿಲೆವಾರಿ ಕೆಲಿ. ತಶೆಂಚ್ ಅಜ್ಜಿನಡ್ಕಾಂತ್ ಸಿಮಿಸ್ತ್ರೆಕ್ ಮಂಜೂರ್ ಜಾಲ್ಲ್ಯಾ ಜಾಗ್ಯಾರ್ ದಿಯೆಸೆಜಿಚ್ಯಾ  ವ್ಹಡಿಲಾಂಚ್ಯಾ ಅನುಮತೆನ್ ಏಕ್ ಮಾಟೊವ್ ಘಾಲುನ್ ಹರ್ಯೆಕಾ ಸನ್ವರಾ ಮೀಸ್ ಭೆಟಂವ್ಕ್ ತಾತ್ಕಾಲಿಕ್ ವ್ಯವಸ್ಥಾ ಆಸಾ ಕೆಲಿ.

ತಾ. 29-05-1997 ವೆರ್ ಬಾ| ಬೆನೆಡಿಕ್ಟ್ ಎಸ್. ರೇಗೊ ವಿಟ್ಲ ಫಿರ್ಗಜೆಕ್ ವಿಗಾರ್ ಜಾವ್ನ್ ಆಯ್ಲೆ, ಮನೆಲಾ ಕೊಪೆಲಾಕ್ ಮೀಸ್ ಭೆಟಂವ್ಕ್ ಆಯಿಲ್ಲ್ಯಾ ತಾಣಿಂ ಹಾಂಗಾಚ್ಯಾ ಲೊಕಾಚಿ ಪರಿಸ್ಥಿತಿ ಸಮ್ಜೊನ್ ಘೆತ್ಲಿ. ಹ್ಯಾ ಜಾಗ್ಯಾರ್ ಇಗರ್ಜೆಚ್ಯೆ ಬಾಂದಾಪ್ ಬಾಂಧುಂಕ್ ಸಮತಟ್ಟ್  ಕರ್ಚೆಂ ಕಾಮ್ ಹಾತಿಂ ಘೆತ್ಲೆಂ. ಹಾಂಗಾಸರ್ ಏಕ್ ಬಾಂದಾಪ್ ಆಸಾ ಕರ್ನ್ ಎಕಾ ಬಾಂದ್ಪಾಂತ್ ಮಿಸಾಚ್ಯಾ ಬಲಿದಾನಾಚಿಂ ವಸ್ತು ದವರ್ನ್ ಭಾಯ್ರ್ ಮಿಸಾಚ್ಯಾ  ಬಲಿದಾನ್ ಭೆಟಂವ್ಚಿ  ವೆದಿ ಬಾಂದ್ಲಿ. ಲೊಕಾಕ್ ರಾವೊಂಕ್ ಏಕ್ ಮಾಟೊವ್ ಘಾಲ್ನ್ ಮಿಸಾಚ್ಯಾ ಬಲಿದಾನ್ ಆಯ್ಕುಂಚೆಂ ಪರಿಂ ವ್ಯವಸ್ಥಾ ಕೆಲಿ. ಫಿರ್ಗಜೆಚ್ಯಾ ಲೊಕಾ ಥಾವ್ನ್ ಆನಿ ಭಾಯ್ಲ್ಯಾ ಫಿರ್ಗಜಾಂನಿ ದಾನ್ ಎಕ್ಟಾಯ್ ಕರ್ನ್ ತಶೆಂಚ್ ಪ್ರೊಪಗಂದ ಫಿದೈ ರೊಮಾ ಥಾವ್ನ್ ಕುಮೊಕ್ ಎಕ್ಟಾಯ್ ಕರ್ನ್ ಹೆಂ ಬಾಂದಾಪ್ ಉಬೆಂ ಜಾಲೆಂ. ಹ್ಯಾ ವೆಳಾರ್ ಲೊಕಾಂನಿ ಕೆಲ್ಲಿಂ ತಿಂ ಶ್ರಮದಾನಾ ಹರ‍್ಯೆಕ್ ಫಿರ್ಗಜ್‍ಗಾರಾಂಚೊ ಘಾಮ್ ಹ್ಯಾ ಭುಮಿಚೆರ್ ಪಡುನ್ ಫಿರ್ಗಜೆಚ್ಯಾ ಸ್ಥಾಪನಾಕ್ ಸಾಕ್ಷಿ ಜಾಲಿಂ. ತಾ. 23-05-2006 ವೆರ್ ಮಂಗ್ಳುರ್ಚೊ ಧರ್ಮಾಧ್ಯಕ್ಷ್ ಅ| ಮಾ| ದೊ| ಎಲೋಶಿಯಸ್ ಪಾವ್ಲ್ ಸೋಜಾಂನಿ ಹ್ಯಾ ನವ್ಯಾ ದೇವ್‍ಮಂದಿರಾಚೆಂ ಆಶೀರ್ವಚನ್ ಆನಿ ಉಗ್ತಾವಣ್ ಕೆಲೆ. ತ್ಯಾಚ್ಚ್ ದಿಸಾ “ಕ್ರೀಸ್ತ್ ರಾಯಾಚಿ ಫಿರ್ಗಜ್”, ಮನೆಲಾ, ಪುಣಚ, ಹಿ ನವಿ ಫಿರ್ಗಜ್ ಅಸ್ತಿತ್ವಾಕ್ ಆಯ್ಲಿ  ಆನಿ ಫಿರ್ಗಜೆಕ್  ಪಯ್ಲೊ  ವಿಗಾರ್ ಜಾವ್ನ್ ಮಾ| ಬಾ| ಬೆನೆಡಿಕ್ಟ್ ರೇಗೊ ನೇಮಕ್ ಜಾಲೆಂ.

ತಾ. 29-05-2010 ವೆರ್ ವಿಗಾರ್ ಜಾವ್ನ್ ಮಾ| ಬಾ| ವಿನ್ಸೆಂಟ್ ರೋಬರ್ಟ್ ಕ್ರಾಸ್ತಾ ನೇಮಕ್ ಜಾಲೆ. ತೆ ಸಾಂ. ಫಿಲೋಮಿನಾ ಕಾಲೇಜ್ ಪುತ್ತೂರಾಂತ್ ಪ್ರಾಧ್ಯಾಪಕ್ ಜಾವ್ನ್ ಸೆವಾ ದೀವ್ನ್ ಆಸ್‍ಲ್ಲೆ. ತಾ 12-06-2010 ವೆರ್ ಕ್ರೀಸ್ತ್ ರಾಯ್ ಕೊವೆಂತಾಂಚಿಂ ಉಗ್ತಾವಣ್ ಜಾಲಿ. ಮನೆಲಾ ಫಿರ್ಗಜೆಚ್ಯೆ ಶಿಲ್ಪಿ ಸ್ಥಾಪಕ್ ವಿಗಾರ್ ಮಾ| ಬಾ| ಬಿ. ಯಸ್. ರೇಗೊ ತಾ.06-03-2011 ವೆರ್ ದೆವಾಧೀನ್ ಜಾಲೆ. ದೆ| ಬಾಪ್ ಬಿ. ಯಸ್. ರೇಗೊ ಸ್ವಪಣ್, ಫಿರ್ಗಜ್ ಯಾಜಕಾಚೆಂ ವಸ್ತೆ ಘರಾಚೆಂ ಕಾಮ್ ನವೆಂ ವಿಗಾರ್ ಮಾ| ಬಾ| ವಿನ್ಸೆಂಟ್ ಕ್ರಾಸ್ತಾ ಬಾಪಾಂನಿ ಹಾತಿಂ ಘೆತ್ಲೆಂ. ಸರ್ವ್ ಫಿರ್ಗಜ್‍ಗಾರಾಂಚ್ಯಾ ತಶೆಂಚ್ ಉದಾರ್ ಮನಾಚ್ಯಾ ದಾನಿಂಚ್ಯಾ ಸಹಕಾರಾನ್ ಹೆಂ ವಸ್ತೆ ಘರಾಚೆಂ ಕಾಮ್ ಸಂಪಯ್ಲೆ. ಕೃಷೆಂತ್ ವಿಶೇಷ್ ಆಸಕ್ತ್ ಆಸ್‍ಲ್ಲ್ಯಾನ್ ಮಾ| ವಿನ್ಸೆಂಟ್ ಬಾಪಾಂನಿ ಲೊಕಾ ಸಾಂಗಾತಾ ರಾವುನ್ ಫಿರ್ಗಜೆಂತ್ ಬರೊ ಆದಾಯ್ ಹಾಡ್ಚ್ಯಾಕ್  ಪ್ರೇರಣ್ ದಿಲೆ.

ತಾ. 28-05-2013 ವೆರ್ ಮಾ| ಬಾ| ಸ್ಟೀವನ್ ಡಿ’ಸೋಜ ವಿಗಾರ್ ಜಾವ್ನ್ ನೇಮಕ್ ಜಾಲೆ. ವಿಗಾರಾಚ್ಯಾ  ವಸ್ತೆ  ಘರಾ  ವಯ್ರ್  ಏಕ್ ಮಿನಿ ಸಾಲಾಚೆಂ ಕಾಮ್ ಸಂಪಯ್ಲೆ. ಫಿರ್ಗಜೆಚ್ಯಾ ಆನಿ ದಾನಿಂಚ್ಯಾ ಆರ್ಥಿಕ್ ಸಹಕಾರಾನ್ ಹೆಂ ಬಾಂದ್ಪಾಚೆಂ ಕಾಮ್ ಸಂಪವ್ನ್ ತಾ. 23-05-2013 ವೆರ್ ದೆ| ಬಾ| ಬಿ. ಯಸ್. ರೇಗೊ ಸ್ಮಾರಕ್ ಮಿನಿ ಸಾಲಾಚೆಂ ಆಶೀರ್ವಚನ್ ಆನಿ ಉಗ್ತಾವಣ್ ಕೆಲೆ. ಅಜ್ಜಿನಡ್ಕ ಜಾಗ್ಯಾ ಭೊಂವ್ತಣಿಂ ವ್ಹೊಂಯಿ ಘಾಲ್ಚೆಂ ಕಾಮ್ ಕೆಲಾಂ. ಕೃ಼ಷೆಕ್ ಉದ್ಕಾಚಿಂ ವ್ಯವಸ್ಥಾಂ ಜಾವ್ನ್ ನೊವೆಂ ಬೊರ್‍ವೆಲ್ ಕಾಡುನ್ ತಾಕಾ ಪಂಪಾಚಿಂ ವ್ಯವಸ್ಥಾಂ ಕರ್ನ್ ಕೃ಼ಷೆಚೆಂ ಅಭಿವೃದ್ಧೆಚೆಂ ಕಾಮ್ ಪೊಂತಾಕ್ ಪಾವಯ್ಲಾಂ. ಫಿರ್ಗಜ್ ದಶಮಾನೋತ್ಸವಾಚ್ಯಾ ಸಂದರ್ಭಿ ಅಲ್ತಾರಾಚೆ  ನವೀಕರಣ್ ಕಾಮ್ ಹಾತಿಂ ಘೆತ್ಲೆಂ. ಪಂಚಾಯತಾಚ್ಯಾ ಅನುದಾನ ವರ್ವಿಂ ಇಗರ್ಜೆ ಗೆಟಿ ಕಡೆ  ರಸ್ತ್ಯಾಕ್ ಡಾಮರ್ ಘಾಲ್ಚೆಂ ಕಾಮ್ ಪೊಂತಾಕ್ ಪಾವಯ್ಲಾ. 

ಫಾ| ಪ್ರಕಾಶ್ ಡಿಸೋಜ ತಾ. 02-06-2017 ವೆರ್ ಆಮ್ಚ್ಯಾ ಫಿರ್ಗಜೆಂತ್ ವಿಗಾರ್ ಜಾವ್ನ್ ನೇಮಕ್ ಜಾಲೆಂ. ತಾಣಿಂ ಇಗರ್ಜೆ ಲಾಗ್ಶಿಲೊ ಗುಡೊ ಕಾಡ್ನ್ ಮೈದಾನ್ ವ್ಹಡ್ ಕೆಲೆಂ. ಕಂಪೌಂಡಾಚೆಂ ಕಾಮ್ ಕರ್ನ್ ಥಂಯ್ಸರ್ ಖುರ್ಸಾ ವಾಟೆಚಿಂ ಸ್ತೆಸಾಂವಾಂ ಉಬಿಂ ಕೆಲಿ. ಇಂಟರ್‍ಲಾಕ್ ಘಾಲ್ನ್ ಇಗರ್ಜೆಚೆಂ ಸೊಭಾಯ್ ಚಡಯ್ಲಿ. ಗೇಟಿ ಲಾಗಿಂ ಮರ್ಯೆಚೊ ಆಕರ್ಷಿತ್ ಗ್ರೊಟ್ಟೊ ಬಾಂದುನ್ ನವಿ ಗೇಟ್ ಉಬಿಂ ಕೆಲಿಂ. ಗಾಯಾನ್ ಪಂಗ್ಡಾಂಕ್ ರಾವೊಂಕ್ ಜಾಗ್ಯಾಚಿ ಅಡ್ಕಣಿ ನಿವಾರ್ಚ್ಯಾಕ್ ಇಗರ್ಜೆ ಭಿತರ್ ಚಡಿತ್ ಜಾಗೊ ಕೆಲಾಂ. ಭಕ್ತಿಕಾಂಕ್ ಬಸೊಂಕ್ ನವ್ಯಾ ಬಾಂಕಾಚೆಂ ವ್ಯವಸ್ಥಾ ಕೆಲ್ಯಾ. ಅಜ್ಜಿನಡ್ಕ ಇಗರ್ಜೆಚ್ಯಾ ಜಾಗ್ಯಾರ್ ಐ.ಸಿ.ವೈ.ಯಂ ಚ್ಯಾ ಮುಖೇಲ್ಪಣಾಂ ದ್ವಾರಿಂ ನೊವೆಂ ಘರ್ ಬಾಂದ್ಲಾಂ.  ಫುಲಾಚೆಂ ತೊಟ್ ಕೆಲಾಂ ,ತಶೆಂಚ್ ತೊಟಾಂತ್ ಮಾಡ್ಯೊ ಸಸ್ಯೊ ಲಾವ್ನ್ ತೋಟ್ ಅಭಿವೃದ್ಧಿ ಕೆಲಾ.

ತಾ. 18-05-2023 ವೆರ್ ಮಾ| ಬಾ| ನೆಲ್ಸನ್ ಒಲಿವೆರಾ ಫಿರ್ಗಜೆಕ್ ವಿಗಾರ್ ಜಾವ್ನ್ ನೇಮಕ್ ಜಾಲೆ. ಹಾಣಿಂ ಆಯೋಗಾಚೆ ರಚನ್ ಕರ್ನ್, ಆಯೋಗ್ ಜಿವಾಳ್ ದವರ್ಲ್ಯಾತ್. ಕೃಷಿ ಸಮಿತಿ ಮುಖಾಂತ್ರ್ ಅಪುರ್ಬಾಯೆನ್ ವಾವ್ರ್ ಕೆಲಾ. ಅಜ್ಜಿನಡ್ಕ ಮಾಡ್ಯೆಂ ತೊಟಾಕ್ ಉದಾಕ್ ಉಣೆಂ ಪೊಡ್ಲ್ಯಾಂ ಕಾರಣಾಂ ವರ್ವಿಂ ಸಗ್ಳ್ಯಾ ತೊಟಾಕ್ ಡ್ರಿಪ್ಪಾಚಿಂ ವ್ಯವಸ್ಥಾಂ ಕೆಲ್ಯಾಂ.  ವಿವಿಧ್ ತರ್ಭೆತಿ, ಶಿಭಿರಾಂ, ಕ್ರಿಸ್ಮಸ್ ಸೌಹಾರ್ದ ಮಾಂಡುನ್ ಹಾಡ್ಲ್ಯಾತ್. ಆಧ್ಯಾತ್ಮಿಕ್ ಆನಿ ನೈತಿಕ್ ಮೌಲ್ಯಾಂನಿಂ ವಾಡಂವ್ಕ್ ಪ್ರೋತ್ಸಾಹ್ ದಿಲಾ. ತಶೆಂಚ್ ಕಾರ್ಯಕ್ರಮಾಚಿಂ ಸಾರ್ಕಿ ಮಾಂಡಾವಾಳ್  ಘಾಲುಂಕ್  ಉತ್ತೇಜನ್  ದಿಲಾ. 

ತಾ. 1-05-2024 ವೆರ್ ಮಾ| ಬಾ| ಸ್ಟಾನಿ ರೊಡ್ರಿಗಸ್ ಮನೆಲಾ ಫಿರ್ಗಜೆಚೊ ವಿಗಾರ್ ಜಾವ್ನ್ ಗೊವ್ಳಿ ಬಾಪಾನಿಂ ನಮಿಯಾರ್ನ್ ಅತಾಂ ಅಪ್ಲಿ ಸೆವಾ ಮುಂದರುನ್ ಆಸಾತ್. 

ಗೊವ್ಳಿಕ್ ಪರಿಷದೆಂತ್ ಎದೊಳ್ ಪರ್ಯಾಂತ್ ಉಪಾಧ್ಯಕ್ಷ್ ಜಾವ್ನ್ ಸೆವಾ ದಿಲ್ಲೆ ಡೇನಿಯೆಲ್ ಡಿ ಸೋಜ, ಅಂಬ್ರೋಜ್ ಮೊಂತೇರೊ, ಸಿರಿಲ್ ಫೆರಾವೊ ಆನಿ ಕಾರ್ಯದರ್ಶಿ ಜಾವ್ನ್ ಅಂಬ್ರೊಜ್ ಮೊಂತೇರೊ, ಜೋಸೆಫ್ ಮೊಂತೇರೊ, ಜಾನೆಟ್ ಟೆಲ್ಲಿಸ್ ಆನಿ ಉರ್ಬಾನ್ ಡಿ ಸೋಜ. ಪ್ರಸ್ತುತ್ ಉಪಾಧ್ಯಕ್ಷ್ ಜಾವ್ನ್ ರೋಶನ್ ಟೆಲ್ಲಿಸ್ ಆನಿ ಕಾರ್ಯದರ್ಶಿ ಜಾವ್ನ್ ಫಿಲೋಮಿನಾ ಡಿ ಸೋಜ ಸೆವಾ ದಿವ್ನ್ ಆಸಾತ್.

ಎದೊಳ್ ಪರ್ಯಾಂತ್ ಗುರ್ಕಾರ್ ಜಾವ್ನ್ ಸೆವಾ ದಿಲ್ಲೆ ಜಾವ್ನ್ ಆಸಾತ್ ಮೌರಿಸ್ ಟೆಲ್ಲಿಸ್ ದೇವರಗುಂಡಿ, ಡೇನಿಯೆಲ್ ಟೆಲ್ಲಿಸ್ ದೇವರಗುಂಡಿ,  ಎಲ್ಯಾಸ್ ಡಿ ಸೋಜ ಸಾಗು, ಮೌರಿಸ್ ಡಿ ಸೋಜ ಕೋಡಿ, ಆಲ್ಭರ್ಟ್ ಕುಟಿನ್ಹೊ  ಗ್ರೀನ್‍ಫೀಲ್ಡ್, ಕ್ಸೇವಿಯರ್ ಡಿ ಸೋಜ ಪಾಲಸ್ತಡ್ಕ, ಫ್ರಾನ್ಸಿಸ್ ಕುಟಿನ್ಹೊ  ಗ್ರೀನ್‍ಫೀಲ್ಡ್, ಅಲ್ಫೊನ್ಸ್ ಮೊಂತೆರೊ ಎರ್ಮೆತ್ತಡ್ಕ, ಸಿರಿಲ್ ಫೆರಾವೊ ಸಾಗು, ಪ್ರೀತಿ ಡಿ ಸೋಜ ಮನೆಲಾ, ಫ್ರಾನ್ಸಿಸ್ ಡಿ ಸೋಜ ಮೊಟ್ಟೆತ್ತಡ್ಕ. ಪ್ರಸ್ತುತ್ ಸೆವಾ ದಿಂವ್ಚೆಂ ಗುರ್ಕಾರ್ ಅಲ್ಫೊನ್ಸ್ ಮೊಂತೇರೊ ಎರ್ಮೆತ್ತಡ್ಕ, ಕ್ಸೇವಿಯರ್ ಫೆರಾವೊ ಕಮ್ಮಾಜೆ ಆನಿ ಎವರೆಸ್ಟ್  ಮೊಂತೇರೊ ಮಣಿಲಾ.

ಆಮ್ಚ್ಯಾ ಫಿರ್ಗಜೆಚ್ಯಾ ಹರ‍್ಯೆಕಾ ಸಂಗ್ತಿಂನಿಂ ವಾಂಟೊ ಘೆತ್ಲ್ಯಾ ಆನಿ ಉದಾರ್ ಮನಾಚಿ ಸೆವಾ ದಿಲ್ಲ್ಯಾ ಸರ್ವ್ ಫಿರ್ಗಜ್ ಗಾರಾಂಕ್  ಕ್ರೀಸ್ತ್ ರಾಯ್ ಆಶೀರ್ವಾದಾನಿಂ ಭರುಂ.

ಕ್ರೀಸ್ತ್ ರಾಯ್ ಫಿರ್ಗಜೆಚಿ ದೇವ್ ಪ್ರಜಾ

ಮನೆಲಾ