ಫೆಬ್ರವರಿ 23, 2025

ಮನೆಲಾ ಕ್ರೀಸ್ತ್ ರಾಯ್ ಫಿರ್ಗಜೆಂತ್ ದೇವ್ ಆಪವ್ಣೆ ಆನಿ ಯಾಜಕಿ ತರ್ಭೆತಿ  ಆಯೋಗಾನ್ ಅಲ್ತಾರ್ ಭುರ್ಗ್ಯಾಂಚೊ ಆನಿ ಮಿಶನರಿ ಮೆಳಾಚೊ ಜುಬ್ಲೆವ್ ಫೆಬ್ರವರಿಚಾ 23 ತಾರಿಕೆರ್ ಆಯ್ತಾರಾ ಸಕಾಳಿಂ 10:30 ವರಾರ್ ಆಚರಣ್ ಕೆಲೊ. ಹ್ಯಾ ಕಾರ್ಯಾಂತ್ ಫಿರ್ಗಜೆಚಾ 29 ಅಲ್ತಾರ್ ಭುರ್ಗ್ಯಾಂನಿ ಭಾಗ್ ಘೆತ್ಲೆಂ. ಭುರ್ಗ್ಯಾಂಕ್ ವಿವಿಧ್ ರಿತಿಚೆ ಖೆಳ್ ಚಲವ್ನ್ ವ್ಹೆಲೆಂ. ಶ್ವೇತಾ ಪ್ರೀಯಾ ಮೊಂತೇರೊ, ಶೈಲಾ ಡಿಸೋಜ ಆನಿ ಪ್ರೀಯಾ ಡಿಸೋಜ ಹಾಣಿಂ ಖೆಳಾ ಸಾಂಗಾತಾ ಭುರ್ಗ್ಯಾಂಕ್ ಮಾತೆವಾಚಾ ವಾಂಜೆಲಾಂತ್ಲೆ ವಿವಿಧ್ ಸವಾಲಾಂ ವಿಚಾರ್ನ್ ಚಾರ್ ಪಂಗ್ಡಾಕ್ ಕ್ವಿಜ್ ಚಲವ್ನ್ ವ್ಹೆಲೆಂ. ಭುರ್ಗ್ಯಾಂನಿ ಸಕ್ರಿಯ್ ರಿತಿನ್ ಭಾಗ್ ಘೆತ್ಲೆಂ.

ಉಪ್ರಾಂತ್ ವೆದಿ ಕಾರ್ಯೆಂ ಚಲವ್ನ್ ವ್ಹೆಲೆಂ. ವೆದಿಚೆರ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಮಾನೆಸ್ತ್ ರೋಶನ್ ಟೆಲ್ಲಿಸ್, ಕಾರ್ಯದರ್ಶಿ ಫಿಲೋಮಿನಾ ಡಿಸೋಜ, 21 ಆಯೋಗಾಚೊ ಸಂಯೋಜಕ್ ಮಾನೆಸ್ತ್ ವಿಕ್ಟರ್ ಕುಟಿನ್ಹಾ, ವೆದಿ ಸೆವಾಕಾಂಚೊ ಅಧ್ಯಕ್ಷ್ ಹೆನ್ಸನ್ ಡಿಸೋಜ ಆನಿ ಮಿಶನರಿ ಮೆಳಾಚೊ ಅಧ್ಯಕ್ಷ್ ಕ್ಲೆವಿನ್ ಫೆರಾವೊ ಉಪಸ್ಥಿತ್ ಆಸ್ಲೆಂ. ಮಾನೆಸ್ತ್ ರೋಶನ್ ಟೆಲ್ಲಿಸಾನ್ ಆಪ್ಲ್ಯಾ ಸಂದೇಶಾಂತ್ ಭುರ್ಗ್ಯಾಂಕ್ ಥೊಡಿ ಬೂದ್ ಬಾಳ್ ಸಾಂಗ್ಲಿಂ. 

ಅಧ್ಯಕ್ಷ್ ಸ್ಥಾನ್ ಘೆತ್ಲೆಂ ವಿಗಾರ್ ಮಾ| ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್ ಬಾಪಾನಿಂ ಆಪ್ಲ್ಯಾ ಸಂದೇಶಾಂತ್ ವೆದಿ ಸೆವಾ ದೀಂವ್ಚ್ಯಾ  ಭುರ್ಗ್ಯಾಂಚಿ ಹೊಗ್ಳಿಕ್ ಉಚಾರ್ಲಿ ಆನಿ ತಾಂಕಾ ಬರೆಂ ಮಾಗ್ಲೆಂ. ಖೆಳಾಂತ್ ಜಿಕ್ಲೆಲ್ಲ್ಯಾಂಕ್ ಇನಾಮಾ ವಾಂಟ್ಲಿ. ಹೆನ್ಸನ್ ಡಿಸೋಜಾನ್ ಆಯ್ಲ್ಯಾ ಸರ್ವಾಂಕ್ ಬರೊ ಯೆಂವ್ಕಾರ್ ಮಾಗ್ಲೊ. ಕ್ಲೆವಿನ್ ಫೆರಾವೊನ್ ಧನ್ಯವಾದ್ ದಿಲೆಂ. ಕಾರ್ಯಾಚಾ ಅಕ್ರೇಕ್ ಆಯೋಗಾಚಾ ಸಾಂದ್ಯಾಂನಿ ಭುರ್ಗ್ಯಾಂಕ್ ಜೆವ್ಣಾಚೆಂ  ವ್ಯವಸ್ಥಾ ಕರ್ನ್ ಧಾದೋಶಿ ಕೆಲೆಂ. ಆಯೋಗಾಚೊ ಸಂಚಾಲಕ್ ಎವರೆಸ್ಟ್ ಮೊಂತೇರೊನ್ ಕಾರ್ಯೆಂ ಚಲಯ್ಲೆಂ.