ನವೆಂಬರ್ 3, 2024

ಹ್ಯಾಚ್ ನವೆಂಬರ್ 3 ವೆರ್ ಆಯ್ತಾರಾ ಕ್ರೀಸ್ತ್ ರಾಯಾಕ್ ಸಮರ್ಪಿಲ್ಲ್ಯಾ ಮನೆಲಾ ಫಿರ್ಗಜೆಂತ್ ಪವಿತ್ರ್ ಪುಸ್ತಕ್ ಆನಿ ಕ್ರೀಸ್ತೀ ಶಿಕ್ಷಣ್ ಆಯೋಗ್, ಫಿರ್ಗಜ್ ಗೊವ್ಳಿಕ್ ಪರಿಷದ್ ಆನಿ ವೈ.ಸಿ.ಯಸ್‍ಚಾ ಮುಖೆಲ್ಪಣಾಖಾಲ್ ಕ್ರೀಸ್ತೀ ಶಿಕ್ಷಣ್ ಶಿಕ್ಷಕಾಂಚೊ ದೀಸ್ ಆನಿ ಕ್ರೀಸ್ತೀ ಶಿಕ್ಷಣ್ ದಿವಸ್ ಆಚರಣ್ ಕೆಲೊ.

ಸಕಾಳಿಂ 7.30 ವರಾರ್ ವಿಗಾರ್ ಬಾಪ್  ಸ್ಟ್ಯಾನಿಸ್ಲಸ್ ರೊಡ್ರಿಗಸ್ ಹಾಣಿಂ ಪವಿತ್ರ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಸರ್ವ್ ಶಿಕ್ಷಕ್ ಆನಿ ಭುರ್ಗ್ಯಾಂ ಖಾತಿರ್ ವಿಶೇಷ್ ಜಾವ್ನ್ ಮಾಗ್ಲೆಂ. ಕ್ರೀಸ್ತೀ ಶಿಕ್ಷಣ್ ದೀಂವ್ಚ್ಯಾ ಶಿಕ್ಷಕಾನಿಂ ದೇವ್‍ಸ್ತುತಿ ಚಲವ್ನ್ ವ್ಹೆಲಿಂ. ಕ್ರೀಸ್ತೀ ಶಿಕ್ಷಣ್ ಭುರ್ಗ್ಯಾಂನಿ ಅಪುರ್ಬಾಯೆಚೆ ಗಾಯನ್ ಕೆಲೆಂ. ಮಿಸಾ ಉಪ್ರಾಂತ್ ಸರ್ವ್ ಫಿರ್ಗಜ್ಗಾರಾಂಕ್ ಕಾಫಿ-ಫಳಾರ್ ವಾಂಟ್ಲೆಂ. ಪ್ರಾರ್ಥನಾ ನೃತ್ಯಾದ್ವಾರಿಂ ಸಾಂಸ್ಕೃತಿಕ್  ಕಾರ್ಯೆಂ ಆರಂಭ್ ಕೆಲೆಂ. ಹರ್ಯೆಕಾ ಕ್ಲಾಸಿಚಾ ಭುರ್ಗ್ಯಾಂನಿ ಬೈಬಲ್ ಆಧಾರಿತ್ ಡ್ಯಾನ್ಸ್, ನಟನ್, ಕವಾಲಿ ಆನಿ ನಾಟ್ಕುಳೊ ಪ್ರದರ್ಶನ್ ಕರ್ನ್ ಭೋವ್ ಅಪುರ್ಬಾಯೆಚೆ ಸಾಂಸ್ಕೃತಿಕ್  ಕಾರ್ಯೆಂ ಮಾಂಡುನ್ ಹಾಡ್ಲೆಂ. ಶಿಕ್ಷಕಾಂನಿ ಭುರ್ಗ್ಯಾಂಕ್  ಪ್ರೋತ್ಸಾಹ್, ತರ್ಭೆತಿ ದೀವ್ನ್ ಹರ್ಯೆಕಾ ಭುರ್ಗ್ಯಾಂನಿ ಸಕ್ರೀಯ್ ರಿತಿನ್ ವಾಂಟೊ ಘೆತ್ಲಾಂ.

ಸಾಂಸ್ಕೃತಿಕ್  ಕಾರ್ಯೆಂ ಸಂಪ್ತಚ್ ಮಟ್ವೆಂ ವೆದಿ ಕಾರ್ಯೆಂ ಚಲವ್ನ್ ವ್ಹೆಲೆಂ.   ವಿಗಾರ್ ಬಾಪ್  ಸ್ಟ್ಯಾನಿಸ್ಲಸ್ ರೊಡ್ರಿಗಸ್, ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್ ರೋಶನ್ ಟೆಲ್ಲಿಸ್, ಕಾರ್ಯದರ್ಶಿ ತಶೆಂಚ್ ಕ್ರೀಸ್ತೀ ಶಿಕ್ಷಕಾಚಿ ಸಂಯೋಜಕಿ ಫಿಲೋಮಿನಾ ಡಿಸೋಜ, ಆಯೋಗ್ ಸಂಯೋಜಕ್ ವಿಕ್ಟರ್ ಕುಟಿನ್ಹೊ, ಪವಿತ್ರ್ ಪುಸ್ತಕ್ ಆನಿ ಕ್ರೀಸ್ತೀ ಶಿಕ್ಷಣ್ ಆಯೋಗಾಚಿ ಸಂಚಾಲಕಿ ತಶೆಂಚ್ ಕೊವೆಂತಾಚಿ ವ್ಹಡಿಲ್ನ್ ಸಿ| ಸರಿತಾ ಡಿಸೋಜ, ವೈ.ಸಿ.ಯಸ್ ಸಚೇತಕಿ ಫಿಲೋಮಿನಾ ಮೊಂತೇರೊ ವೆದಿರ್ ಹಾಜರ್ ಆಸ್ಲಿಂ. ಸಬಾರ್ ಫಿರ್ಗಜ್ಗಾರಾಂನಿ ಹ್ಯಾ ಕಾರ್ಯಾಂತ್ ವಾಂಟೊ ಘೆತ್ಲೊ.

ವೈ.ಸಿ.ಯಸ್ ಭುರ್ಗ್ಯಾಂನಿ ಶಿಕ್ಷಕಾಂಚಾ ದಿಸಾಚೆ ಗೀತ್ ಗಾವ್ನ್ ಶಿಕ್ಷಕಾಂಕ್ ಉಲ್ಲಾಸ್ ಪಾಟಯ್ಲೆಂ. ಕ್ರೀಸ್ತೀ ಶಿಕ್ಷಕಾಂಚಾ ದಿಸಾಚೊ ಮಹತ್ವ್ ಮೆಲಿಶಾ ರಿಯಾ ಮೊತೇರೊನ್ ತಿಳ್ಸಿಲೆಂ. ವಿಗಾರ್ ಬಾಪಾನಿಂ ಹರ್ಯೆಕಾ ಶಿಕ್ಷಕಾಂಕ್  ವೈ.ಸಿ.ಯಸ್ ತರ್ಫೆನ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಬರೆಂ ಮಾಗ್ಲೆಂ. ವಿಗಾರ್ ಬಾಪಾಂಕ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಬರೆಂ ಮಾಗೊನ್ ಉಪಾಧ್ಯಕ್ಷ್ ರೋಶನ್ ಟೆಲ್ಲಿಸಾನ್ ಸಂದೇಶ್ ದೀವ್ನ್ ಕ್ರೀಸ್ತೀ ಶಿಕ್ಷಣಾಂ ವಿಶಿಂ  ಬರೆಂ ಮಾಗ್ಲೆಂ. ವಿಗಾರ್ ಬಾಪಾನಿಂ ಆಪ್ಲ್ಯಾ ಸಂದೇಶಾಂತ್  ಭುರ್ಗ್ಯಾಂಚ್ಯಾ ಸಾಂಸ್ಕೃತಿಕ್  ಕಾರ್ಯಕ್ರಮ ವಿಶಿಂ ಶಭಾಸ್ಕಿ ಉಚಾರ‍್ಲಿಂ. ಭುರ್ಗ್ಯಾಂಚ್ಯಾ ವ್ಹಡಿಲಾಂಕ್ ತಶೆಂಚ್ ಶಿಕ್ಷಕಾಂಕ್ ಉಲ್ಲಾಸ್ ಪಾಟಯ್ಲೆಂ.

ವೈ.ಸಿ.ಯಸ್ ಭುರ್ಗಿಂ ರೋಹನ್ ಮೊಂತೇರೊ ಆನಿ ಪ್ರಿನ್ಸಿಯಾ ಡಿಸೋಜನ್ ಸಾಂಸ್ಕೃತಿಕ್  ಕಾರ್ಯೆಂ ಚಲವ್ನ್ ವ್ಹೆಲೆಂ. ಶಿಕ್ಷಕಿ ಶ್ವೇತಾ ಮೊಂತೇರೊನ್ ವೆದಿ ಕಾರ್ಯೆಂ ಚಲವ್ನ್ ವ್ಹೆಲೆಂ. ಫಿರ್ಗಜ್ ಗೊವ್ಳಿಕ್ ಪರಿಷದ್ ಕಾರ್ಯದರ್ಶಿ ಆನಿ ಕ್ರೀಸ್ತೀ ಶಿಕ್ಷಣ್ ಸಂಯೋಜಕಿ ಫಿಲೋಮಿನಾ ಡಿಸೋಜನ್ ಉಪ್ಕಾರ್ ಆಟಯ್ಲೊ. ಉಪ್ರಾಂತ್ ದನ್ಪರಾ 12.00 ವರಾರ್ ಕಾರ್ಯೆಂ ಸಂಪ್ಲೆಂ.