ಫೆಬ್ರವರಿ 23, 2025

ಕ್ರೀಸ್ತ್ ರಾಯಾಕ್ ಸಮರ್ಪಿಲ್ಲ್ಯಾ ಮನೆಲಾ ಫಿರ್ಗಜೆಂತ್ ಹ್ಯಾಚ್ 2025 ಫೆಬ್ರವರಿಚ್ಯಾ 23 ತಾರಿಕೆರ್ ಆಯ್ತಾರಾ  ಕ್ರೀಸ್ತೀ ಶಿಕ್ಷಣ್ ದಿವಸ್ ಆಚರಣ್ ಕೆಲೊ. ಸಕಾಳಿಂ 7:30 ವರಾರ್ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್ ಹಾಣಿಂ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಕ್ರೀಸ್ತೀ ಶಿಕ್ಷಣ್ ಭುರ್ಗ್ಯಾಂನಿ ದೇವ್ ಸ್ತುತಿ ಚಲವ್ನ್ ವ್ಹೆಲಿಂ. ಮಿಸಾ ಉಪ್ರಾಂತ್ ಸರ್ವ್ ಫಿರ್ಗಜ್ಗಾರಾಂಕ್ ಸಕಾಳಿಂಚೊ ಫಳಾಹಾರ್ ದಿಲೊ.

ಸಕಾಳಿಂ 9:00 ವರಾರ್ ಪ್ರಾರ್ಥನ್ ಗಿತಾದ್ವಾರಿಂ ವೆದಿ ಕಾರ್ಯೆಂ ಆರಂಭ್ ಕೆಲೆಂ. ವೆದಿರ್ ಫಿರ್ಗಜ್ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್, ಫಿರ್ಗಜ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಮಾನೆಸ್ತ್ ರೋಶನ್ ಟೆಲ್ಲಿಸ್, ಕಾರ್ಯದರ್ಶಿ ಆನಿ ಕ್ರಿಸ್ತೀ ಶಿಕ್ಷಣ್ ಸಂಯೋಜಕಿ ಮಾನೆಸ್ತಿಣ್ ಫಿಲೋಮಿನಾ ಡಿಸೋಜ, 21 ಆಯೋಗ್ ಸಂಚಾಲಕ್ ಮಾನೆಸ್ತ್ ವಿಕ್ಟರ್ ಕುಟಿನ್ಹಾ,  ಕ್ರೀಸ್ತೀ ಶಿಕ್ಷಣ್ ಜೊಡ್ಚ್ಯಾ ಭುರ್ಗ್ಯಾಂಚ್ಯಾ ವ್ಹಡಿಲಾಂ ಪಯ್ಕಿ ಮಾನೆಸ್ತಿಣ್ ಜ್ಯೋತಿ ಡಿಸೋಜ, ಪವಿತ್ರ್ ಪುಸ್ತಕ್ ಆನಿ ಕ್ರೀಸ್ತೀ ಶಿಕ್ಷಣ್ ಸಂಚಾಲಕಿ ಸಿ. ಸರಿತಾ ಡಿಸೋಜ ಹಾಜರ್ ಆಸ್ಲಿಂ. ತಶೆಂಚ್ ಕ್ರೀಸ್ತೀ ಶಿಕ್ಷಣಾಚಾ ಭುರ್ಗ್ಯಾಂಚಿಂ ವ್ಹಡಿಲಾಂ ಆನಿ ಫಿರ್ಗಜ್ ಗಾರಾಂ ಕಾರ್ಯಾಂತ್ ಹಾಜರ್ ಆಸ್ಲಲಿಂ. ವೆದಿರ್ ಆಸ್ಲ್ಯಾ ಸರ್ವಾಂನಿ ವಿಗಾರಾ ಸವೆಂ ಸಾಂಗಾತ್ ದೀವ್ನ್ ದಿವೊ ಪೆಟವ್ನ್ ಪವಿತ್ರ್ ಪುಸ್ತಕಾಕ್ ಮಾನ್ ಕೆಲೊ. ಜಮ್ಲೆಲ್ಲ್ಯಾ ಸಮೇಸ್ತಾಂಕ್ ಸಂಯೋಜಕಿ ಫಿಲೋಮಿನಾ ಡಿಸೋಜನ್ ಸ್ವಾಗತ್ ಕೆಲೊ.

ಭುರ್ಗ್ಯಾಂ ಪಯ್ಕಿ ಕ್ರೀಸ್ತೀ ಶಿಕ್ಷಣ್ ಜೋಡ್ನ್ ತಾಚೊ ಅನುಭವ್ ಪ್ರಿನ್ಸಿಯಾ ಶಲ್ಮಾ ಡಿಸೋಜ ಆನಿ ಮೆಲಿಶಾ ರಿಯಾ ಮೊಂತೇರೊನ್ ವಾಂಟುನ್ ಘೆತ್ಲೊ. 2024-25 ಕ್ರೀಸ್ತೀ ಶಿಕ್ಷಣಾಚಿ ವರ್ದಿ ಫಿಲೋಮಿನಾ ಡಿಸೋಜನ್ ಸಭೆ ಮುಖಾರ್ ದವರ್ಲಿ. ಆಪ್ಲ್ಯಾ ಭುರ್ಗ್ಯಾಂ ಸಾಂಗಾತಾ ಜೊಡ್ಲೊ ಕ್ರೀಸ್ತೀ ಶಿಕ್ಷಣಾಚೊ ಅನ್ಬೋಗ್  ಭೊಗ್ಣಾಂ ಮಾನೆಸ್ತಿಣ್ ಜ್ಯೋತಿ ಡಿಸೋಜ ಆನಿ 21 ಆಯೋಗ್ ಸಂಚಾಲಕ್ ಮಾನೆಸ್ತ್ ವಿಕ್ಟರ್ ಕುಟಿನ್ಹೊನ್ ವಾಂಟುನ್ ಘೆತ್ಲೊ.

ಪ್ರಸ್ತುತ್ 2024-25 ವ್ಯಾ ವರ್ಸಾ ಕ್ರೀಸ್ತೀ ಶಿಕ್ಷಣಾಚಾ ಚಟುವಟಿಕೆಂತ್ ಜಿಕ್ಲೆಲ್ಲ್ಯಾಂಕ್ ಇನಾಮಾಂ ವಾಂಟ್ಚೆಂ ಕಾರ್ಯೆಂ ಶಿಕ್ಷಕಿ ಮಾನೆಸ್ತಿಣ್ ರೊಸ್ಲಿನ್ ಲಸ್ರಾದೊನ್ ಚಲವ್ನ್ ವ್ಹೆಲೆಂ. ಉಪ್ರಾಂತ್ ಫಿರ್ಗಜ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ರೋಶನ್ ಟೆಲ್ಲಿಸಾನ್ ಕಾರ್ಯಕ್ ಉದ್ದೇಶಿಸುನ್ ಉಲವ್ನ್, ಕ್ರೀಸ್ತೀ ಶಿಕ್ಷಣಾ ಥಂಯ್ ಹೊಗ್ಳಿಕ್ ಉಚಾರ್ಲಿ. ಆಮ್ಚೆಂ ಫಿರ್ಗಜ್ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್ ಆಪ್ಲ್ಯಾ ಸಂದೇಶಾಂತ್ ಕ್ರೀಸ್ತೀ ಶಿಕ್ಷಣಾಚೊ ಮಹತ್ವ್ ಸಮ್ಜವ್ನ್ ಸರ್ವ್ ಬರೆಂ ಮಾಗ್ಲೆಂ ಆನಿ ಕ್ರೀಸ್ತೀ ಶಿಕ್ಷಣ್ ದೀಂವ್ಚ್ಯಾ ಸರ್ವ್ ಶಿಕ್ಷಕಾಂಕ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ಮಾನ್ ಕೆಲೊ.

ಹೆ ಕಾರ್ಯೆಂ ಸಾವಿಯಾ ಪ್ರೀಶಲ್ ಡಿಸೋಜ ಆನಿ ಸ್ವೀಡಲ್ ಪ್ರೀಯಾ ಡಿಸೋಜನ್ ಕಾರ್ಯನಿರ್ವಾಹಕ್ ಜಾವ್ನ್ ಚಲವ್ನ್ ವ್ಹೆಲೆಂ. ಹ್ಯಾ ಕಾರ್ಯಂತ್ ಪವಿತ್ರ್ ಪುಸ್ತಕ್ ಆನಿ ಶ್ರೀಸ್ತೀ ಶಿಕ್ಷಣ್ ಆಯೋಗಾಚಾ ಸಾಂದ್ಯಾಂನಿ ತಶೆಂಚ್ ಕ್ರೀಸ್ತೀ ಶಿಕ್ಷಣಾಚಾ ಶಿಕ್ಷಕಾಂನಿಂ ಎಕಾಮೆಕಾ ಸಹಕಾರ್ ದಿಲೊ. ಅಕ್ರೆಕ್ ಶಿಕ್ಷಕ್ ಪ್ರೀತಮ್ ಡಿಸೋಜನ್ ಧನ್ಯವಾದ್ ಪಾಟವ್ನ್ ಕಾರ್ಯೆಂ ಸಮಾಪ್ತ್ ಕೆಲೆಂ. ಉಪ್ರಾಂತ್ ಜಮ್ಲ್ಯಾ ಸಮೆಸ್ತಾಂಕ್ ಐಸ್ ಕ್ರೀಮ್ ವಾಂಟ್ಲೆಂ.