ನವೆಂಬರ್ 09, 2025

ಕ್ರೀಸ್ತ್ ರಾಯಾಕ್  ಸಮರ್ಪಿಲ್ಲ್ಯಾ  ಮನೆಲಾ  ಫಿರ್ಗಜೆಂತ್ ನವೆಂಬರಾಚಾ  9 ತಾರಿಕೆರ್ ಕ್ರೀಸ್ತೀ ಶಿಕ್ಷಣ್ ಶಿಕೊಂವ್ಚ್ಯಾ  ಶಿಕ್ಷಕಾಂಚೊ ಪಾತ್ರೊನ್ ಸಾಂ. ಚಾರ್ಲ್ಸ್ ಬೊರೊಮಿಯಾಕ್ ಕ್ರೀಸ್ತೀ ಶಿಕ್ಷಣ್ ದಿಂವ್ಚ್ಯಾ ಸರ್ವ್ ಶಿಕ್ಷಕಕಾಂನಿಂ ಫುಲಾಂ ಅರ್ಪುನ್  ಮಾನ್ ಕರ್ನ್  ಸಕಾಳಿಂ 7.30 ವರಾರ್ ವಿಗಾರ್ ಬಾಪ್  ಸ್ಟ್ಯಾನಿಸ್ಲಾಸ್ ರೊಡ್ರಿಗಸಾಂನಿ  ಪವಿತ್ರ್ ಮಿಸಾಚೆಂ ಬಲಿದಾನ್ ಭೆಟವ್ನ್  ಪವಿತ್ರ್ ತೆಂಪ್ಲಾಚೊ ಮಹತ್ವ್ ಆನಿ ಕ್ರೀಸ್ತೀ ಶಿಕ್ಷಣಾಚೆ ವರ್ತೆಂ ಮಿಸಾಂವಾಂ  ವಿಶ್ಯಾಂತ್ ಸಂದೇಶ್ ದಿಲೊ. ಕ್ರೀಸ್ತೀ ಶಿಕ್ಷಣ್ ದಿಂವ್ಚ್ಯಾ  ಸರ್ವ್ ಶಿಕ್ಷಕಾಂಕ್  ಬರೆಂ ಮಾಗ್ಲೆಂ. ಶಿಕ್ಷಕಾಂನಿ ಭೋವ್ ಅಪುರ್ಬಾಯೆನ್ ದೇವ್ ಸ್ತುತಿ ಚಲವ್ನ್ ವೆಲಿ. ತಶೆಂಚ್ ಭುರ್ಗ್ಯಾಂನಿಂ ಗಾಯನ್ ಕೆಲೆಂ ಆನಿ ಮಿಸಾ ವೆಳಾರ್ ಸರ್ವ್ ಶಿಕ್ಷಕಾಂನಿ ಕಾಣಿಕೊ ಅರ್ಪಿಲ್ಯೊ.ಮಿಸಾ ಉಪ್ರಾಂತ್ ಸರ್ವ್ ಫಿರ್ಗಜ್ ಗಾರಾಂಕ್ ಕಾಫಿ ಫಳಾರ್ ವಾಂಟ್ಲೊ.

10.00 ವರಾರ್ ಕ್ರೀಸ್ತೀ ಶಿಕ್ಷಣಾಚೊ ಪಾತ್ರೊನ್ ಸಾಂ ಚಾರ್ಲ್ಸ್ ಬೊರೊಮಿಯೊಕ್  ಮಾನಾಚಾ ಸರ್ಯ್ಯಾಂನಿ ದಿವೊ ಪೆಟವ್ನ್ ಕಾರ್ಯಚಿ ಸುರ್ವಾತ್ ಕೆಲಿ. ಕ್ರೀಸ್ತೀ ಶಿಕ್ಷಣ್ ದಿಂವ್ಚ್ಯಾ ಶಿಕ್ಷಕಾನಿಂ ಪ್ರಾರ್ಥನ್ ಗಿತಾ ದ್ವಾರಿಂ ಕಾರ್ಯಚೆರ್ ದೆವಾಚೊ ಆಶೀರ್ವಾದ್ ಮಾಗ್ಲೊ. YCS ಭುರ್ಗ್ಯಾಂನಿಂ ಗಿತಾ ಮುಖಾಂತ್ರ್ ಸರ್ವಾಂಕ್ ಸ್ವಾಗತ್ ಕೆಲೊ. ಉಪ್ರಾಂತ್  ಕ್ರೀಸ್ತೀ ಶಿಕ್ಷಣ್ ಜೊಡ್ಚ್ಯಾ ಹರ್ಯೆಕಾ ಭುರ್ಗ್ಯಾಂನಿಂ ಬೈಬಲ್ ಆಧಾರಿತ್ ಅಭಿನಯ್ ಗೀತ್, ನಾಚ್, ನಾಟ್ಕುಳೆ ಮುಖಾಂತ್ರ್ ಸಾಂಸ್ಕೃತಿಕ್ ಕಾರ್ಯೆಂ ಚಲವ್ನ್  ಅಪ್ಲಿ ತಾಲೆಂತಾ ಪ್ರದರ್ಶಿತ್ ಕರ್ನ್ ಸರ್ವಾಂಚಿಂ ಮನಾಂ ಸಂತೊಸಾಯ್ಲಿ.

ಉಪ್ರಾಂತ್ ವೆದಿ ಕಾರ್ಯೆಂ ಚಲವ್ನ್ ವೆಲೆಂ. ವೆದಿರ್ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್, 21 ಆಯೋಗ್ ಸಂಯೋಜಕ್ ವಿಕ್ಟರ್ ಕುಟಿನ್ಹಾ, ಫಿರ್ಗಜ್ ಗೊವ್ಳಿಕ್ ಪರಿಷದ್ ಕಾರ್ಯದರ್ಶಿ ತಶೆಂಚ್ ಕ್ರೀಸ್ತೀ ಶಿಕ್ಷಣ್ ಸಂಯೋಜಕಿ ಫಿಲೋಮಿನಾ ಡಿಸೋಜಾ, ಪವಿತ್ರ್ ಪುಸ್ತಕ್ ಆನಿ ಕ್ರಿಸ್ತೀ ಶಿಕ್ಷಣ್ ಆಯೋಗ್ ಕಾರ್ಯದರ್ಶಿ ರೆನಿಟಾ ಡಿಸೋಜಾ ಆನಿ YCS ಸಚೇತಕ್ ಪ್ರಿತಮ್ ಡಿಸೋಜಾ ಹಾಜರ್ ಆಸಲ್ಲಿ. ಶಿಕ್ಷಕಿ ಲವಿನಾ ಕುಟಿನ್ಹಾನ್ ಸರ್ವಾಂಕ್ ಸ್ವಾಗತ್ ಕೆಲೊ. YCS ಸಚೇತಕಾನ್ ಕ್ರೀಸ್ತೀ ಶಿಕ್ಷಣಾಚಾ ಶಿಕ್ಷಕಾಂಚೊ ಮಹತ್ವ್ ತಿಳ್ಸಿಲೊ ಆನಿ ಸರ್ವ್ ಶಿಕ್ಷಕಾಂಕ್ ಮಾನ್ ಕರ್ನ್, YCS ಭುರ್ಗ್ಯಾಂನಿಂ ಉಲ್ಲಾಸ್ ಗೀತ್ ಗಾವ್ನ್ ಉಗ್ಡಾಸಾಚಿ ಕಾಣಿಕ್ ದಿಂವ್ಚೆಂ ಕಾರ್ಯೆಂ ಚಲವ್ನ್ ವೆಲೆಂ. 21 ಅಯೋಗ್ ಸಂಯೋಜಕ್ ವಿಕ್ಟರ್ ಕುಟಿನ್ಹಾನ್ ಕ್ರೀಸ್ತೀ ಶಿಕ್ಷಣಾವಿಶಿಂ ಶಬಾಸ್ಕಿ ಉಚಾರ್ಲಿ. ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸಾಂನಿ ಅಪ್ಲ್ಯಾ ಸಂದೇಶಾಂತ್ ಕ್ರೀಸ್ತೀ ಶಿಕ್ಷಣ್ ದಿಂವ್ಚ್ಯಾ ಭುರ್ಗ್ಯಾಂಕ್ ತಶೆಂಚ್ ಶಿಕ್ಷಕಾಂಕ್ ಸರ್ವ್ ಬರೆಂ ಮಾಗ್ಲೆಂ ಆನಿ ಸಾಂಸ್ಕೃತಿಕ್ ಕಾರ್ಯೆಂ ವಿಶಿಂ ಉಲವ್ನ್ ಪಾಟಿಂ ಅಸಲ್ಲಿ ಭುರ್ಗಿಂ ವೆದಿರ್ ಮುಖಾರ್ ಯೇವ್ನ್ ಉಲಂವ್ಕ್ ಸಕ್ಲ್ಯಾಂತ್ ಮ್ಹಣ್  ಶಬಾಸ್ಕಿ ಉಚಾರ್ಲಿ. ಅಕ್ರೆಕ್ ಕ್ರೀಸ್ತೀ ಶಿಕ್ಷಣ್ ಸಂಯೋಜಕಿ ಫಿಲೋಮಿನಾ ಡಿಸೋಜನ್ ಧನ್ಯವಾದ್ ಪಾಟಯ್ಲೆಂ. ಸೊಹಾನಿ ಕುಟಿನ್ಹೊನ್ ಸಾಂಸ್ಕೃತಿಕ್ ಕಾರ್ಯೆಂ ತಶೆಂಚ್ ಶಿಕ್ಷಕಿ ಫಿಲೋಮಿನಾ ಮೊಂತೆರೊನ್ ವೆದಿ ಕಾರ್ಯೆಂ ಚಲವ್ನ್ ವೆಲೆಂ. ಜಮ್ಲ್ಯಾ ಸಮೆಸ್ತಾಂಕ್ ಐಸ್ ಕ್ರೀಮ್ ವಾಂಟುನ್ ದಾದೊಶಿ ಕೆಲೆಂ. ದನ್ಪರಾ 12.00 ವರಾರ್ ಕಾರ್ಯೆಂ ಸಂಪ್ಲೆಂ.