ಜನವರಿ  06, 2025

ಕ್ರೀಸ್ತ್ ರಾಯ್ ವಾಡ್ಯಾಂತ್ ಕ್ರೀಸ್ತ್ ರಾಯಾಕ್ ಮಾನ್ ಕರ್ನ್ ವಾಡ್ಯಾ ಫೆಸ್ತ್ ಜನವರಿ 06 ತಾರಿಕೆರ್ ಸಾಂಜೆರ್  4.00 ವರಾಂಕ್ ಮಾನೆಸ್ತ್ ಬೆನೆಡಿಕ್ಟ್ ಜ್ಯೋತಿ ಕಲ್ಲಾಜೆ ಹಾಂಚ್ಯಾ  ಘರಾಂ ಆಚರಣ್ ಕೆಲೆಂ.ವಿಗಾರ್ ಬಾಪ್ ಮಾ| ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್ , ಗುರ್ಕಾರ್, ಪ್ರತಿನಿಧಿ ಆನಿ ವಾಡ್ಯಾಗಾರಾ 86 ಜಣ್ ಸಾಂದೆ ಹಾಜರ್ ಆಸ್ಲೆಂ. ಸಾಂಗಾತಾಚ್ ಫಿರ್ಗಜ್ ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್ ರೋಶನ್ ಟೆಲ್ಲಿಸ್, ಕಾರ್ಯದರ್ಶಿ ಫಿಲೋಮಿನಾ ಡಿಸೋಜ, ಲ್ಹಾನ್ ಕ್ರೀಸ್ತಾಂವ್ ಸಮುದಾಯೆಚೊ ಸಂಚಾಲಕ್ ಮಾನೆಸ್ತ್ ಜೇಮ್ಸ್ ಟೆಲ್ಲಿಸ್, ಭಾಗೆವಂತ್ ಕುಟ್ಮಾಂ ವಾಡ್ಯಾಚೊ ಗುರ್ಕಾರ್ ಎವರೆಸ್ಟ್ ಮೊಂತೇರೊ, ಬಾಳೊಕ್ ಜೆಜು ವಾಡ್ಯಾಚಿ ಪ್ರತಿನಿಧಿ ಲೀನಾ ಡಿಸೋಜ ಹಾಜರ್ ಆಸ್ಲಿಂ. ಜಮ್ಲೆಲ್ಲ್ಯಾ ಸರ್ವಾಂಕ್ ಘರ್ಚಾನಿ ತಂಡ್ ಪೀವನ್ ದಿಲೆಂ.

ಉಪ್ರಾಂತ್ ಸಂಭ್ರಮಾಚೆ ಪಯ್ಲೆಂ ಕಾರ್ಯೆಂ ಜಾವ್ನ್ ಪವಿತ್ರ್ ಪುಸ್ತಕಾಕ್ ಮಾನ್ ಕರ್ನ್ ವಾತಿಯೊ ಪೆಟೊವ್ನ್ ಬೈಬಲ್ ಪುರ್ಶ್ಯಾವಾರ್ ವ್ಹರ್ನ್ ಮಾನ್ ಕೆಲೊ. ಮಾಗ್ಣ್ಯಾ ವಿಧಿ ಸುಚಿತಾ ಕಲ್ಲಾಜೆ ಆನಿ ವಾಡ್ಯಾಗಾರಾಂನಿ ಚಲವ್ನ್ ವ್ಹೆಲೆಂ. ಕ್ರೀಸ್ತ್ ರಾಯಾಚೆ ನವಿಂ ಇಮಾಜ್ ಬೆಂಜಾರ್ ಕರ್ನ್ ಮಾಗ್ಣೆಂ ಅಕೇರ್ ಕೆಲೆಂ. ಉಪ್ರಾಂತ್ ಚಾ ಆನಿ ಬಿಸ್ಕಟ್ ವಾಟ್ಲೆಂ. ಉಪ್ರಾಂತ್ ವಾಡ್ಯಾಗಾರಾಂನಿ ಸಾಂಗಾತಾ ಮೆಳೊನ್ ಗ್ರೂಪ್ ತಸ್ವೀರ್ ಕಾಡ್ಲಿಂ. ವೈ. ಸಿ.ಯಸ್ ಆನಿ ಫಿಲೋಮಿನಾ ಮೊಂತೇರೊನ್ ಸರ್ವಾಂಕ್ ಖೆಳ್ ಚಲವ್ನ್ ವ್ಹೆಲೆಂ. ಸರ್ವ್ ವಾಡ್ಯಾಚೆ ಭುರ್ಗ್ಯಾಂನಿ ಆನಿ ಯುವಜಣಾಂನಿ ನಾಚ್ ಸಾದಾರ್ ಕೆಲೊ. 

ವೆದಿರ್ ವಿಗಾರ್ ಬಾಪ್ ಸ್ಟಾನಿಸ್ಲಾಸ್ ರೊಡ್ರಿಗಸ್, ಗೊವ್ಳಿಕ್ ಪರಿಷದೆಚೊ ಉಪಾಧ್ಯಕ್ಷ್, ಕಾರ್ಯದರ್ಶಿ, ವಾಡ್ಯಾಚೆ ದೋಗ್ ಪ್ರತಿನಿಧಿ ಬಸ್ಕಾಂ ಸ್ವೀಕಾರ್ ಕೆಲಿಂ . ಕಾರ್ಯಾಚೆ ಕಾರ್ಯನಿರ್ವಹಣ್ ಪ್ರಿಯಾ ಡಿಸೋಜ ಹಾಣಿಂ  ಚಲವ್ನ್ ವ್ಹೆಲೆಂ. ವೆದಿರ್ ಆಸ್ಚ್ಯಾ ಸರ್ವಾಂಕ್ ಗುರ್ಕಾರ್  ಕ್ಸೇವಿಯರ್ ಫೆರಾವೊ ಹಾಣಿಂ  ಸ್ವಾಗತ್ ಕೆಲೊ. ತಾಂಕಾ ವಾಡ್ಯಾಗಾರಾಂನಿ ಫುಲ್ ದೀವ್ನ್ ಸ್ವಾಗತ್ ಕೆಲೊ. ವಾಡ್ಯಾಚೆ ಕಾರ್ಯದರ್ಶಿ ಮೇರಿ ಡಿಸೋಜ ಹಾಣಿಂ ವಾರ್ಷಿಕ್ ವರ್ದಿ ಮಂಡನ್ ಕೆಲಿಂ . ಉಪ್ರಾಂತ್ ಸಂತೋಷ್ ರೇಖಾ ಡಿಸೋಜ  ನಟ್ಟಿ ಆನಿ ಸ್ಟೀಡಲ್ ಡಿಸೋಜ ತಾಂಕಾಂ ಸನ್ಮಾನ್ ಕಾರ್ಯೆಂ ಚಲವ್ನ್ ವ್ಹೆಲೆಂ. ಅನುಷಾ ಡಿಸೋಜಾನ್ ತಾಂಚಿ ವಳಕ್ ಕರ್ನ್ ತಾಂಕಾಂ ಅಭಿನಂದನ್ ಪಾಟಯ್ಲೆಂ. ಖೆಳಾಂತ್ ಜಿಕ್ಲೆಲ್ಲ್ಯಾಂಕ್ ಇನಾಮಾ ವೆದಿರ್ ಆಸ್ಲೆಲ್ಲ್ಯಾ ಸಯ್ರ್ಯಾಂನಿ ವಾಂಟುನ್ ದಿಲಿಂ. ರೋಶನ್ ಟೆಲ್ಲಿಸ್ ಆನಿ ಜೇಮ್ಸ್ ಟೆಲ್ಲಿಸಾನ್ ವಾಡ್ಯಾಗಾರಾಂಕ್ ಬರೆಂ ಮಾಗ್ಲೆಂ. ವಿಗಾರ್ ಬಾಪಾನಿ ವಾಡ್ಯಾಗಾರಾಂಕ್ ಬರೆಂ ಫೆಸ್ತ್ ಮಾಗ್ಲೆಂ ಆನಿ ಶಭಾಸ್ಕಿಂ ಉಚಾರ್ಲಿಂ. ಲಿತುರ್ಜಿ ಆನಿ ಸಗ್ಳೆಂ ಕಾರ್ಯೆಂ ಬರೆಂ ಜಾಲಾ ಆನಿ ಮುಕ್ಲ್ಯಾ ದಿಸಾಂನಿ ಸಾಂಸ್ಕೃತಿಕ್ ಕಾರ್ಯಾಂತ್ ಧಾರ್ಮಿಕ್ ಸಂಗ್ತಿಕ್ ಚಡ್ ಮಹತ್ವ್ ದೀಜಾಯ್ ಮ್ಹಣ್ ಸಲಹಾ ದಿಲಿಂ. ಜಮ್ಲೆಲ್ಲ್ಯಾ ಸರ್ವಾಂಕ್ ಮೆಟಿಲ್ಡಾ ಡಿಸೋಜನ್ ಧನ್ಯವಾದ್ ಪಾಟಯ್ಲೆಂ. ಉಪ್ರಾಂತ್ ಜೆವ್ಣಾಂಚೆರ್ ಆಶೀರ್ವಾದ್ ವಿಗಾರ್ ಬಾಪಾನಿ ಮಾಗ್ಲೆಂ. ವಾಡ್ಯಾಗಾರಾಂನಿ ರಾಂದ್ಲೆಲೆ ರುಚಿಕ್ ಜೆವಾಣ್ ಸೇವ್ನ್ ಫೆಸ್ತಾಚೆ ಕಾರ್ಯೆಂ ಅಕೇರ್ ಕೆಲೆಂ.