ಡಿಸೆಂಬರ್ 24, 2024

2024 ಡಿಸೆಂಬರ್ ಮಹಿನ್ಯಾಚಾ 24 ತಾರಿಕೆರ್ ಸಾಂಜೆರ್ 6.30 ವರಾರ್ ಕ್ರಿಸ್ಮಸ್ ಕ್ಯಾರಲ್ಸ್ ಐ.ಸಿ.ವೈ.ಯಂ ಸಾಂದ್ಯಾಂಚ್ಯಾ ಮುಖೆಲ್ಪಣಾಖಾಲ್ ಚಲವ್ನ್ ವ್ಹೆಲೆಂ. ಉಪ್ರಾಂತ್ 7.00 ವರಾರ್ ನತಲಾಂ ಫೆಸ್ತಾಚೆ ಸಂಭ್ರಮಿಕ್ ಮೀಸ್ ವಿಗಾರ್ ಬಾಪ್ ಸ್ಟ್ಯಾನಿಸ್ಲಸ್ ರೊಡ್ರಿಗಸ್ ಬಾಪಾಂನಿ ಭೆಟಯ್ಲೆಂ. ಫಿರ್ಗಜ್‍ಗಾರಾಂನಿ ದೇವ್ ಸ್ತುತಿ ಚಲವ್ನ್ ವ್ಹೆಲಿಂ. ತಶೆಂಚ್ ಕ್ರೀಸ್ತ್ ರಾಯ್  ವಾಡ್ಯಾಗಾರಾಂನಿ ಗಾಯನ್ ಕೆಲೆಂ.

ಮಿಸಾ ಉಪ್ರಾಂತ್ ನವ್ಯಾನ್ ಶಾಶ್ವತ್ ಪಾಕೆಂ ಕರ್ನ್ ತಯಾರ್ ಕೆಲ್ಲ್ಯಾ ಗರ್ದಾನಾಚಾ ಗೊಟ್ಯಾಚೆರ್ ಬಾಪ್ ಸ್ಟ್ಯಾನಿಸ್ಲಸ್ ರೊಡ್ರಿಗಸ್ ಹಾಣಿಂ ಆಶೀರ್ವಚನ್ ಕೆಲೆಂ. ಫಿರ್ಗಜ್‍ಗಾರಾಂಕ್ ಮಾಲ್ಟ್ ಆನಿ ಕೇಕ್ ವಾಂಟ್ಲೆಂ. ಫಿರ್ಗಜ್‍ಗಾರಾಂನಿ ಹಾಡ್ಲೆಂ ಕುಸ್ವಾರ್ ಸರ್ವ್ ಫಿರ್ಗಜ್‍ಗಾರಾಂಕ್ ಸ್ತ್ರೀ ಸಂಘಟನಾಚಾ ಸಾಂದ್ಯಾಂನಿ ವಾಂಟ್ಲೊ. ಉಪ್ರಾಂತ್ ವೈ.ಸಿ.ಯಸ್ ಭುರ್ಗ್ಯಾಂನಿ ಮಟ್ವೆಂ ಕಾರ್ಯಕ್ರಮ್ ಮಾಂಡುನ್ ಹಾಡ್ಲೆಂ. ವೈ.ಸಿ.ಯಸ್ ಭುರ್ಗ್ಯಾಂನಿ ಎದೊಳ್ ಚಲವ್ನ್ ವ್ಹೆಲ್ಲ್ಯಾ ಸ್ಪರ್ಧಾಂಚಿ ಇನಾಮಾಂ ವಾಂಟ್ಲಿಂ. ಉಪ್ರಾಂತ್ ಫಿರ್ಗಜ್‍ಗಾರಾಂಕ್ ಹೌಸಿ ಹೌಸಿ ಖೆಳ್ ಚಲವ್ನ್ ವ್ಹೆಲೆಂ. ಸಂತಕ್ಲಾಸ್ ಯೇವ್ನ್ ನತಲಾಂ ಫೆಸ್ತಾಚೆ ಉಲ್ಲಾಸ್ ಪಾಟಯ್ಲೆಂ. ಕಾರ್ಯೆಂ ಸಂಪ್ತಚ್ ಗೊವ್ಳಿಕ್ ಪರಿಷದೆಚಾ ಸಾಂದ್ಯಾಂನಿ ಸಾಂಗಾತಾ ಮೆಳೊನ್ ಸರ್ವ್ ಫಿರ್ಗಜ್‍ಗಾರಾಂಕ್ ಜೆವಾಣ್ ದಿಲೆಂ.     

ಫೆಸ್ತಾಕ್ ತಯಾರಾಯ್ ಜಾವ್ನ್  ಐ.ಸಿ.ವೈ.ಯಂ ಆನಿ ವೈ.ಸಿ.ಯಸ್ ಭುರ್ಗ್ಯಾಂನಿ ಫಿರ್ಗಜ್‍ಗಾರಾಂಕ್ ವಿವಿಧ್ ಸ್ಪರ್ಧೆ ಮಾಂಡುನ್ ಹಾಡ್ಲ್ಯಾಂತ್. ಯುವಜಣಾಂನಿ ಫಿರ್ಗಜೆಚಾ ಸರ್ವ್ ಕುಟ್ಮಾಚಿಂ ಭೆಟ್ ದೀವ್ನ್ ನತಾಲಾ ಫೆಸ್ತಾಚೊ ಸಂದೇಶ್ ಪಾಸರ‍್ಲೊ  ಆನಿ ಇಗರ್ಜೆ ಭೊಂವಾರಿ ವೀಜ್  ದಿವ್ಯಾಂನಿ ಸೊಭಯ್ಲೆಂ. ಅಲ್ತಾರ್ ಭುರ್ಗಿಂ ಆನಿ ಐ.ಸಿ.ವೈ.ಯಂ ಸಾಂದ್ಯಾಂನಿ ಕ್ರಿಸ್ಮಸ್ ಟ್ರೀ ತಯಾರ್ ಕೆಲಾಂ. ಐ.ಸಿ.ವೈ.ಯಂ ಆನಿ ವೈ.ಸಿ.ಯಸ್ ಭುರ್ಗ್ಯಾಂನಿ ವ್ಹಡ್ಲಿಂ ನೆಕೆತ್ರಾಂ ತಯಾರ್ ಕರ್ನ್ ಸೊಭಯ್ಲ್ಯಾಂತ್. ಕಥೊಲಿಕ್ ಸಭಾಚಾ ಸಾಂದ್ಯಾಂನಿ ಇಗರ್ಜೆ ಭಿತರ್ ಆನಿ ಭಾಯ್ರ್ ನೆಕೆತ್ರಾಂನಿ ಸುಂರ್ಗಾರಾಯ್ಲೆಂ. ಭಾಗೆವಂತ್ ಕುಟ್ಮಾ ವಾಡ್ಯಾಗಾರಾಂನಿ ಇಗರ್ಜೆಲಾಗಿಂ ಅಪುರ್ಬಾಯೆಚೊ ಗಾರ್ದಾನಾಚೊ ಗೊಟೊ ತಯಾರ್ ಕೆಲಾಂ. ಅಶೆಂ ಫೆಸ್ತ್ ಗದ್ದಾಳಾಯೆನ್ ಆಚರಣ್ ಕೆಲಾಂ.