ನವೆಂಬರ್ 24, 2024

2024 ನವೆಂಬರ್ ಮಹಿನ್ಯಾಚಾ 24 ತಾರಿಕೆರ್ ಕ್ರೀಸ್ತ್ ರಾಯಾಕ್ ಸಮರ್ಪಿಲ್ಲ್ಯಾ ಮನೆಲಾ ಫಿರ್ಗಜೆಂತ್ ಕ್ರೀಸ್ತ್ ರಾಯಾಚೆ ಫೆಸ್ತ್ ವ್ಹಡಾ ದಬಾಜಾನ್ ಸಾಂಜೆರ್ 4.30 ವರಾರ್ ಪರಿಯಾಲ್ತಡ್ಕ ಇಸ್ಕೊಲಾ ಥಾವ್ನ್ ಭಕ್ತಿಪಣಾನ್ ಎವ್ಕರಿಸ್ತಿಕ್ ಪುರ್ಶ್ಯಾಂವ್ ಕಾಡ್ಲೊ. ಬ್ಯಾಂಡಾ ಸಮೇತ್ ಭಕ್ತಿಕ್ ಗಿತಾಂ ಗಾವ್ನ್, ಭುರ್ಗ್ಯಾಂನಿ ಧವಿ ಮುಸ್ತಾಯ್ಕಿ ನ್ಹೆಸೊನ್, ಫುಲಾಂ ಅರ್ಪುನ್ ಎವ್ಕರಿಸ್ತಾಕ್ ಮಾನ್ ಕೆಲೊ. ಪುರ್ಶ್ಯಾಂವಾರ್ ಇಗರ್ಜೆಕ್ ಯೇವ್ನ್ ಸಾಕ್ರಾಮೆಂತಾಚೆ ಆರಾಧನ್ ಜೆಪ್ಪು ಸೆಮಿನಾರಿ ಥಾವ್ನ್ ಆಯ್ಲೆ ಸಯ್ರೆಂ ಯಾಜಕ್ ಬಾಪ್  ಜೊಸ್ವಿನ್ ಡಿಸೋಜ ಹಾಣಿಂ ಚಲವ್ನ್ ವ್ಹೆಲೆಂ. ತಾಚಾ ಉಪ್ರಾಂತ್ ಫಿರ್ಗಜ್‍ಗಾರಾಂಕ್ ಥಂಡ್ ಪೀವನ್ ವಾಂಟ್ಲೆಂ.

ಸಾಂಜೆರ್ 6.00 ವರಾರ್ ಕ್ರೀಸ್ತ್ ರಾಯಾಕ್ ಮಾನ್ ಕರ್ನ್ ಫೆಸ್ತಾಚೆ ಸಂಭ್ರಮಿಕ್ ಮಿಸಾಚೆ ಬಲಿದಾನ್ ಸಯ್ರೆಂ ಯಾಜಕ್ ಬಾಪ್ ಜೊಸ್ವಿನ್ ಡಿಸೋಜ ಹಾಣಿಂ ಭೆಟಯ್ಲೆಂ. ಆಮ್ಚೆಂ ವಿಗಾರ್ ಬಾಪ್ ಸ್ಟ್ಯಾನಿಸ್ಲಸ್ ರೊಡ್ರಿಗಸ್ ಹಾಣಿಂ ಸಹಭೆಟವ್ಣಿಂ ಕೆಲೆಂ. ಬಾಪ್ ಜೊಸ್ವಿನ್ ಡಿಸೋಜನ್ ಅಪುರ್ಬಾಯೆಚೊ ಸಂದೇಶ್ ದಿಲೊ. ಪವಿತ್ರ್ ಎವ್ಕರಿಸ್ತ್ ಏಕ್ ಮಿಸ್ತೆರ್ ಜಾವ್ನಾಸಾ. ತೊ ಭಾವಾರ್ಥಾನ್ ಆಮಿ ಪಾತ್ಯೆಂವ್ಕ್ ಜಾಯ್ ಮ್ಹಣ್ ಎವ್ಕರಿಸ್ತಾ ಥಂಯ್ ಜಾಲ್ಲ್ಯಾ ಅಜಾಪಾಂಚಾ ವಿವಿಧ್ ಘಡಿತಾ ಮುಖಾಂತ್ರ್ ನಿಯಾಳ್ ಕೆಲೊ. ಗೊವ್ಳಿಕ್ ಪರಿಷದೆಚಾ ಸಾಂದ್ಯಾಂನಿ ಅಪುರ್ಬಾಯೆನ್ ದೇವ್‍ಸ್ತುತಿ ಚಲವ್ನ್ ವ್ಹೆಲಿಂ. ಗಾಯಾನ್ ಮಂಡಳಿಚ್ಯಾ ಸಾಂದ್ಯಾಂನಿ ಗಾಯನ್ ಕೆಲೆಂ. ಫೆಸ್ತಾಕ್ ಮುಡ್ದೊಮ್ ಆನಿ ಪ್ರಯೋಜಕ್ ಜಾಲ್ಲ್ಯಾಂಕ್ ವಾತಿ ವಾಂಟುನ್ ಮಾನ್ ಕೆಲೊ. ಮಿಸಾ ಉಪ್ರಾಂತ್ ಸರ್ವ್ ಫಿರ್ಗಜ್‍ಗಾರಾಂನಿ ಭಾವ್ ಬಾಂಧವ್ಪಣಾಚಾ ಸ್ಪಿರಿತಾನ್ ಸಾಂಗಾತಾ ಮೆಳೊನ್ ಭೋವ್ ರುಚಿಕ್ ಬಿರಿಯಾನಿ ಜ್ಹೆವಾಣ್ ಸೇವ್ನ್ ದಾದೊಶಿ ಜಾಲ್ಯಾಂವ್.

ಗೊವ್ಳಿಕ್ ಪರಿಷದೆಚಾ ಸಾಂದ್ಯಾಂನಿ ಸಗ್ಳಿ ಮಾಂಡಾವಾಳ್ ಘಾಲ್ನ್ ಅಪುರ್ಬಾಯೆನ್ ಪುರ್ಶ್ಯಾಂವಾರ್ ಶಿಸ್ತ್ ಸಾಂಬಾಳುಂಕ್, ಹರ್ಯೆಕ್ ಸಂಗ್ತಿಂ ಎಕಾಮೆಕಾ ಸಹಕಾರ್ ದೀವ್ನ್ ವಾವುರ್ಲ್ಯಾಂತ್. ವಾಡ್ಯಾವಾರ್ ಗುರ್ಕಾರಾಂನಿ ಜವಾಬ್ದಾರಿ ಘೆವ್ನ್ ವಾಡ್ಯಾಗಾರಾ ಸಾಂಗಾತಾ ಪುರ್ಶ್ಯಾಂವಾಂಚಿ ವಾಟ್ ಸುಂರ್ಗಾರಾಯ್ಲ್ಯಾ. ವೈ.ಸಿ.ಯಸ್ ಆನಿ ಸಿಸ್ಟರಾಂನಿ ಸಾಂಗಾತಾ ಮೆಳೊನ್ ಅಲ್ತಾರ್ ಸೊಬಾಯ್ಲ್ಯಾ ತಶೆಂಚ್ ಸಾಕ್ರಾಮೆಂತ್ ದವರ್ಚೆಂ ವಾಹನ್  ವೈ.ಸಿ.ಯಸ್  ಆನಿ ಐ.ಸಿ.ವೈ.ಯಂ ಸಾಂದ್ಯಾನಿಂ ಸೊಭಯ್ಲ್ಯಾ. ಅಲ್ತಾರ್ ಭುರ್ಗ್ಯಾಂನಿ ಭಕ್ತಿಪಣಾನ್ ವಾಂಟೊ ಘೆತ್ಲಾ. ಸ್ತ್ರೀ ಸಂಘಟನಾಚಾ ಸಾಂದ್ಯಾಂನಿ ಸತ್ರ್ಯೊ ಘೆವ್ನ್ ಸಹಕಾರ್ ದಿಲಾ. ಯಸ್.ವಿ.ಪಿ ಆನಿ ಕಥೊಲಿಕ್ ಸಭಾಚಾ ಸಾಂದ್ಯಾಂನಿ ಸರ್ವ್ ವಾವ್ರಾಂತ್ ಸಾಂಗಾತ್ ದಿಲಾ. ಫೆಸ್ತ್ ಭೋವ್ ಅಪುರ್ಬಾಯೆನ್ ಜಾಂವ್ಕ್ ಪ್ರಯೋಜಕ್ ಆನಿ ಸಹಕಾರ್ ದಿಲ್ಲ್ಯಾ ಸರ್ವ್ ಫಿರ್ಗಜ್‍ಗಾರಾಂಕ್ ದೇವ್ ಬರೆಂ ಕರುಂ.