ನವೆಂಬರ್ 23, 2025

2025 ನವೆಂಬರ್ ಮಹಿನ್ಯಾಚಾ 23 ತಾರಿಕೆರ್ ಕ್ರೀಸ್ತ್ ರಾಯಾಕ್ ಸಮರ್ಪಿಲ್ಲ್ಯಾ ಮನೆಲಾ ಫಿರ್ಗಜೆಂತ್ ಕ್ರೀಸ್ತ್ ರಾಯಾಕ್ ಮಾನ್ ಕರ್ನ್  ವ್ಹಡಾ ದಬಾಜಾನ್  ಕೊoಪ್ರಿಚೊ ಆಯ್ತಾರ್ ಅಚರಣ್ ಕೆಲೊ. ಸಾಂಜೆರ್ 4.00 ವರಾರ್ ಪವಿತ್ರ್ ಮಿಸಾಚೆ ಬಲಿದಾನ್ ಭೆಟಯ್ಲೆಂ.  ಪ್ರಧಾನ್ ಯಾಜಕ್ ಜಾವ್ನ್ ಪೆರುವಾಯಿ ಫಿರ್ಗಜೆಚೆ ಯಾಜಕ್ ಬಾಪ್  ಸೈಮನ್ ಡಿಸೋಜ  ಆನಿ   ಅಮ್ಚೆ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್ ಹಾಜರ್ ಆಸಲ್ಲೆ. ಎವ್ಕರಿಸ್ತಾಂತ್  ಜಾಲ್ಲ್ಯಾ ಅಜಾಪಾಂಚಾ ಘಡಿತಾ ವಿಶಿಂ ಆನಿ ಕ್ರೀಸ್ತ್ ರಾಯಾ ಮುಖಾಂತ್ರ್ ಕೆಲ್ಲ್ಯಾ ಬರೆಪಣಾ ವಿಶಿಂ ಬಾಪ್ ಸೈಮನಾನ್ ಅಪುರ್ಬಾಯೆಚೊ ಸಂದೇಶ್ ದಿಲೊ. ಫಿರ್ಗಜ್ ಕುಟ್ಮಾಚಾ ಸಾಂದ್ಯಾಂನಿ ಅಪುರ್ಬಾಯೆನ್ ದೇವ್‍ಸ್ತುತಿ ಚಲವ್ನ್ ವ್ಹೆಲಿಂ. ಗಾಯಾನ್ ಮಂಡಳಿಚ್ಯಾ ಸಾಂದ್ಯಾಂನಿ ಗಾಯನ್ ಕೆಲೆಂ. ಫಿರ್ಗಜ್ಗಾರಾಂನಿ ಕಾಣಿಕೊ ಅರ್ಪಿಲ್ಯೊ. ಮಿಸಾಚಾ ಅಕ್ರೆಕ್ ಪವಿತ್ರ್ ಸಾಕ್ರಾಮೆತಾಚೆ ಆರಾಧನ್ ಕರ್ನ್ ಇಗರ್ಜೆ ಥಾವ್ನ್   ಪಾಯ್ ವಾಟೆನ್ ಪರಿಯಾಲ್ತಡ್ಕ ಇಸ್ಕೊಲಾಚಾ ಮೈದಾನಾ ಮ್ಹಣಾಸರ್ ಪರ್ತುನ್ ಥoಯ್ ಥಾವ್ನ್ ಇಗರ್ಜೆಕ್ ಭಕ್ತಿಪಣಾನ್ ಎವ್ಕರಿಸ್ತಿಕ್ ಪುರ್ಶ್ಯಾಂವ್ ಕಾಡ್ಲೊ. ಬ್ಯಾಂಡಾ ಸಮೇತ್ ಭಕ್ತಿಕ್ ಗಿತಾಂ ಗಾವ್ನ್, ಎವ್ಕರಿಸ್ತಾಕ್ ಮಾನ್ ಕೆಲೊ. ಪುರ್ಶ್ಯಾಂವಾರ್ ಇಗರ್ಜೆಕ್ ಯೇವ್ನ್ ಸಾಕ್ರಾಮೆಂತಾಚೆ ಆರಾಧನ್   ಸಯ್ರೆಂ ಯಾಜಕ್ ಬಾಪ್  ಸೈಮನ್ ಡಿಸೋಜ ಹಾಣಿಂ ಚಲವ್ನ್ ವ್ಹೆಲೆಂ. ಮಿಸಾ ಉಪ್ರಾಂತ್ ಸರ್ವ್ ಫಿರ್ಗಜ್‍ಗಾರಾಂನಿ ಭಾವ್ ಬಾಂಧವ್ಪಣಾಚಾ ಸ್ಪಿರಿತಾನ್ ಸಾಂಗಾತಾ ಮೆಳೊನ್ ಭೋವ್ ರುಚಿಕ್ ಬಿರಿಯಾನಿ ಜ್ಹೆವಾಣ್ ಸೆವ್ಲ್ಯಾಂವ್.

ಗೊವ್ಳಿಕ್ ಪರಿಷದೆಚಾ ಸಾಂದ್ಯಾಂನಿ ಸಗ್ಳಿ ಮಾಂಡಾವಾಳ್ ಘಾಲ್ನ್  ICYM ಸಾಂದೆ ಸಾಂಗಾತಾ ಮೆಳೊನ್ ಅಪುರ್ಬಾಯೆನ್ ಪುರ್ಶ್ಯಾಂವಾಚೆ ಶಿಸ್ತ್ ಸಾಂಬಾಳುಂಕ್, ಎಕಾಮೆಕಾ ಸಹಕಾರ್ ದಿಲಾ. ವಾಡ್ಯಾವಾರ್ ಗುರ್ಕಾರಾಂನಿ ಜವಾಬ್ದಾರಿ ಘೆವ್ನ್ ವಾಡ್ಯಾಗಾರಾ ಸಾಂಗಾತಾ ಪುರ್ಶ್ಯಾಂವಾಂಚಿ ವಾಟ್ ಸುಂರ್ಗಾರಾಯ್ಲ್ಯಾ. ಸ್ತ್ರೀಯಾಂನಿ ಆನಿ ಸಿಸ್ಟರಾಂನಿ ಸಾಂಗಾತಾ ಮೆಳೊನ್ ಅಲ್ತಾರ್ ಸೊಬಾಯ್ಲ್ಯಾ ತಶೆಂಚ್ ಸಾಕ್ರಾಮೆಂತ್ ದವರ್ಚೆಂ ವಾಹನ್  ಐ.ಸಿ.ವೈ.ಯಂ ಸಾಂದ್ಯಾನಿಂ ಸೊಭಯ್ಲಾಂ. ಅಲ್ತಾರ್ ಭುರ್ಗ್ಯಾಂನಿ ಭಕ್ತಿಪಣಾನ್ ವಾಂಟೊ ಘೆತ್ಲಾ. ಸ್ತ್ರೀ ಸಂಘಟನಾಚಾ ಸಾಂದ್ಯಾಂನಿ ಸತ್ರ್ಯೊ ಘೆವ್ನ್ ಸಹಕಾರ್ ದಿಲಾ. ಯಸ್.ವಿ.ಪಿ ಸಾಂದ್ಯಾಂನಿ ವಾಹನಾ ಪಾರ್ಕಿಂಗಾಚೆ ಜವಾಬ್ದಾರಿ ಪಾಳ್ಳ್ಯಾ.   ಕಥೊಲಿಕ್ ಸಭಾ ಅನಿ YCS ಸಾಂದ್ಯಾಂನಿ  ಇಗರ್ಜೆ ಭಿತರ್ ಸೊಭಯ್ಲಾಂ.  ಅಶೆಂ ಅಯ್ಚೆಂ ಕಾರ್ಯೆಂ ಭೋವ್ ಅಪುರ್ಬಾಯೆನ್ ಜಾಂವ್ಕ್ ಪ್ರಯೋಜಕ್ ಆನಿ ಸಹಕಾರ್ ದಿಲ್ಲ್ಯಾ ಸರ್ವ್ ಫಿರ್ಗಜ್‍ಗಾರಾಂಕ್ ದೇವ್ ಬರೆಂ ಕರುಂ.