ಫೆಬ್ರವರಿ 22, 2026

ಕ್ರೀಸ್ತ್ ರಾಯಾಕ್ ಸಮರ್ಪಿಲ್ಲ್ಯಾ ಮನೆಲಾ ಫಿರ್ಗಜೆಂತ್ ಹ್ಯಾಚ್ 2026 ಫೆಬ್ರವರಿಚ್ಯಾ 22 ತಾರಿಕೆರ್ ಆಯ್ತಾರಾ  "ಭಾವಾರ್ಥಾಚಾ ಶಿಕೊವ್ಣೆನ್ ಭರ್ವಶಾನ್ ಭರುನ್" ಮ್ಹಳ್ಳ್ಯಾ ಧ್ಯೇಯ್ ವಾಕ್ಯಾ ಖಾಲ್  ಭಾವಾರ್ಥಿ ಶಿಕ್ಷಣ್ ದಿವಸ್ ಆಚರಣ್ ಕೆಲೊ. ಸಕಾಳಿಂ 7:30 ವರಾರ್ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್ ಹಾಣಿಂ ಪವಿತ್ರ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಭಾವಾರ್ಥಿ ಶಿಕ್ಷಣ್ ಭುರ್ಗ್ಯಾಂನಿ ದೇವ್ ಸ್ತುತಿ ಚಲವ್ನ್ ವ್ಹೆಲಿಂ. 

ಸಕಾಳಿಂ 9:00 ವರಾರ್ ಸಭಾ ಸಾಲಾಂತ್ ಪ್ರಾರ್ಥನ್ ಗಿತಾದ್ವಾರಿಂ ವೆದಿ ಕಾರ್ಯೆಂ ಆರಂಭ್ ಕೆಲೆಂ. ವೆದಿರ್ ಫಿರ್ಗಜ್ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್, ಫಿರ್ಗಜ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಮಾನೆಸ್ತ್ ಪ್ರಕಾಶ್ ಮೊಂತೇರೊ, ಕಾರ್ಯದರ್ಶಿ ಮಾನೆಸ್ತಿಣ್ ಪ್ರೆಸಿಲ್ಲಾ ಡಿಸೋಜ, ಆಯೋಗ್ ಸಂಯೋಜಕಿ ಆನಿ ಭಾವಾರ್ಥಿ ಶಿಕ್ಷಣ್ ಸಂಯೋಜಕಿ ಮಾನೆಸ್ತಿಣ್ ಫಿಲೋಮಿನಾ ಡಿಸೋಜ, ಭಾವಾರ್ಥಿ  ಶಿಕ್ಷಣ್ ಸಂಚಾಲಕಿ ಮಾನೆಸ್ತಿಣ್ ಫಿಲೋಮಿನಾ ಮೊಂತೇರೊ, ದೇವ್ ಅಪವ್ಣೆಂ ಆಯೋಗಾಚಿ ಸಂಚಾಲಕಿ ಮಾನೆಸ್ತಿಣ್ ವೀಣಾ ಡಿಸೋಜ, ಭಾವಾರ್ಥಿ ಶಿಕ್ಷಣ್ ಜೊಡ್ಚ್ಯಾ ಭುರ್ಗ್ಯಾಂಚ್ಯಾ ವ್ಹಡಿಲಾಂ ಪಯ್ಕಿ ಮಾನೆಸ್ತಿಣ್ ವಾಲೆಂಟಿನ್ ಡಿಸೋಜ ಆನಿ ಮಾನೆಸ್ತ್ ಉರ್ಬಾನ್ ಡಿಸೋಜ ಹಾಜರ್ ಆಸ್ಲಿಂ .ತಶೆಂಚ್ ಕ್ರೀಸ್ತೀ ಶಿಕ್ಷಣಾಚಾ ಭುರ್ಗ್ಯಾಂಚಿಂ ವ್ಹಡಿಲಾಂ ಆನಿ ಫಿರ್ಗಜ್ ಗಾರಾಂ ಕಾರ್ಯಾಂತ್ ಹಾಜರ್ ಆಸ್ಲಲಿಂ. ಜಮ್ಲೆಲ್ಲ್ಯಾ ಸಮೇಸ್ತಾಂಕ್ ಶಿಕ್ಷಕಿ ಮಾನೆಸ್ತಿಣ್ ಲಿರಿಶ್ಯಾ ಡಿಸೋಜನ್ ಸ್ವಾಗತ್ ಕೆಲೊ. ವೆದಿರ್ ಆಸ್ಲ್ಯಾ ಸರ್ವಾಂನಿ ವಿಗಾರಾ ಸವೆಂ ಸಾಂಗಾತ್ ದೀವ್ನ್ ದಿವೊ ಪೆಟವ್ನ್ ಕಾರ್ಯಚಿ ಸುರ್ವಾತ್ ಕೆಲಿ. ಉಪ್ರಾಂತ್ 2025-26 ವ್ಯಾ ವರ್ಸಾಚಿ ಭಾವಾರ್ಥಿ ಶಿಕ್ಷಣಾಚಿ ವರ್ದಿ ಮಾನೆಸ್ತಿಣ್ ಫಿಲೋಮಿನಾ ಡಿಸೋಜನ್ ಸಭೆ ಮುಖಾರ್ ದವರ್ಲಿ. ಭುರ್ಗ್ಯಾಂಚ್ಯಾ ವರ್ಸಾಚೆ "ಅಮ್ಚಿ ಭುರ್ಗಿಂ ಬಾಳಾಂ, ದೆವಾಚಾ ರಾಜಾಚಿಂ ಫಳಾಂ" ಧ್ಯೇಯ್ ಗೀತ್ ಗಾವ್ನ್ ಶಿಕ್ಷಕಾನಿಂ ಭುರ್ಗ್ಯಾಂಕ್ ಉಲ್ಲಾಸ್ ಪಾಟಯ್ಲೆಂ.

ಭುರ್ಗ್ಯಾಂ ಪಯ್ಕಿ  ಕ್ರೀಸ್ತೀ ಶಿಕ್ಷಣ್ ಜೋಡ್ನ್ ತಾಚೊ ಅನುಭವ್ ಸೊಹಾನಿ ಕುಟಿನ್ಹಾ ಆನಿ ಜೋಸಿಲ್ ಡಿಸೊಜನ್ ವಾಂಟುನ್ ಘೆತ್ಲೊ. ಆಪ್ಲ್ಯಾ ಭುರ್ಗ್ಯಾಂ ಸಾಂಗಾತಾ ಜೊಡ್ಲೊ ಭಾವಾರ್ಥಿ ಶಿಕ್ಷಣಾಚೊ ಅನ್ಬೋಗ್  ಭೊಗ್ಣಾಂ ಮಾನೆಸ್ತಿಣ್ ವಾಲೆಂಟಿನ್  ಡಿಸೋಜ ಆನಿ ಮಾನೆಸ್ತ್ ಉರ್ಬಾನ್ ಡಿಸೋಜನ್ ವಾಂಟುನ್ ಘೆತ್ಲೊ. ಉಪ್ರಾಂತ್ ಫಿರ್ಗಜ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ಪ್ರಕಾಶ್ ಮೊಂತೇರೊನ್ ಕಾರ್ಯಕ್ ಉದ್ದೇಶಿಸುನ್ ಉಲಯ್ಲೊ. ಆಮ್ಚೆಂ ಫಿರ್ಗಜ್ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸಾಂನಿ ಆಪ್ಲ್ಯಾ ಸಂದೇಶಾಂತ್ ಕ್ರೀಸ್ತೀ ಶಿಕ್ಷಣಾಚೊ ಮಹತ್ವ್ ಸಮ್ಜವ್ನ್ ಸರ್ವ್ ಬರೆಂ ಮಾಗ್ಲೆಂ. ಪ್ರಸ್ತುತ್ 2025-26 ವ್ಯಾ ವರ್ಸಾ ಭಾವಾರ್ಥಿ ಶಿಕ್ಷಣಾಚಾ ಚಟುವಟಿಕೆಂತ್ ಜಿಕ್ಲೆಲ್ಲ್ಯಾಂಕ್ ಇನಾಮಾಂ ವಾಂಟ್ಚೆಂ ಕಾರ್ಯೆಂ ಶಿಕ್ಷಕಿ ರೆನಿಟಾ ಡಿಸೋಜನ್  ಚಲವ್ನ್ ವ್ಹೆಲೆಂ. ಉಪ್ರಾಂತ್ ಭಾವಾರ್ಥಿ ಶಿಕ್ಷಣ್ ದಿಂವ್ಚ್ಯಾ ಸರ್ವ್ ಶಿಕ್ಷಕಾಂಕ್ ಉಗ್ಡಾಸಾಚಿ ಕಾಣಿಕ್ ದೀವ್ನ್ ವಿಗಾರ್ ಬಾಪಾನಿಂ ಮಾನ್ ಕೆಲೊ.

ಪ್ರಿಯಾ ಡಿಸೋಜನ್ ಕಾರ್ಯನಿರ್ವಾಹಕ್ ಜಾವ್ನ್ ಕಾರ್ಯೆಂ ಚಲವ್ನ್ ವ್ಹೆಲೆಂ. ಭುರ್ಗ್ಯಾಂನಿಂ ತಯಾರ್ ಕೆಲ್ಲಿ ಬೈಬಲ್ ಚಾರ್ಟಾಂ ಅಪುರ್ಬಾಯೆನ್ ಪ್ರದರ್ಶಿತ್ ಕೆಲ್ಯಾಂತ್. ಹ್ಯಾ ಕಾರ್ಯಂತ್ ಭಾವಾರ್ಥಿ ಶಿಕ್ಷಣ್ ಆಯೋಗ್ ಆನಿ ದೇವ್ ಅಪವ್ಣೆಂ ಆಯೋಗಾಚಾ ಸಾಂದ್ಯಾಂನಿ ತಶೆಂಚ್ ಭಾವಾರ್ಥಿ  ಶಿಕ್ಷಣ್ ದಿಂವ್ಚ್ಯಾ ಶಿಕ್ಷಕಾಂನಿಂ ಎಕಾಮೆಕಾ ಸಹಕಾರ್ ದಿಲೊ. ಅಕ್ರೆಕ್ ಶಿಕ್ಷಕಿ ಸಿ. ನ್ಯಾನ್ಸಿ ನೊರೊನ್ಹಾನ್ ಧನ್ಯವಾದ್ ಪಾಟವ್ನ್ ಅಕ್ರೆಕ್ ಸೊಮ್ಯಾಕ್ ಧಿನ್ವಾಸುoಯಾo ಗೀತ್ ಗಾವ್ನ್ ಕಾರ್ಯೆಂ ಸಮಾಪ್ತ್ ಕೆಲೆಂ. ಉಪ್ರಾಂತ್ ಜಮ್ಲ್ಯಾ ಸಮೆಸ್ತಾಂಕ್ ಕಾಫಿ ಫಳಾರ್ ವಾಂಟ್ಲೊ.