ಜುಲಾಯ್ 20, 2025

ಕ್ರೀಸ್ತ್ ರಾಯಾಕ್ ಸಮರ್ಪಿಲ್ಲ್ಯಾ ಮನೆಲಾ ಫಿರ್ಗಜೆಂತ್ ಜುಲಾಯ್ ಮಹಿನ್ಯಾಚ್ಯಾ 20 ತಾರಿಕೆರ್ ಕುಟ್ಮಾಂ ಆಯೋಗ್ ಆನಿ  ವೈ.ಸಿ.ಯಸ್ ಸಾಂಗಾತಾ ಮೆಳೊನ್ ಮಾಲ್ಗಡ್ಯಾಂಚೊ ದೀಸ್ ಆಚರಣ್ ಕೆಲೊ. ಸಕಾಳಿಂ 7.30 ವರಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸಾಂನಿ ಪವಿತ್ರ್ ಮಿಸಾಚೆ ಬಲಿದಾನ್ ಭೆಟಯ್ಲೆಂ ಆನಿ ಆಮ್ಚ್ಯಾ ಫಿರ್ಗಜೆಚ್ಯಾ ಸರ್ವ್  ಮಾಲ್ಗಡ್ಯಾಂ ಖಾತಿರ್ ವಿಶೇಷ್ ರಿತಿನ್ ಮಾಗ್ಲೆಂ. ಮೀಸ್ ಜಾಲ್ಲೆಂಚ್ 8.45 ವರಾರ್ ಫಿರ್ಗಜೆಚ್ಯಾ ಸಭಾಸಾಲಾಂತ್ ಸರ್ವ್  ಮಾಲ್ಗಡ್ಯಾಂಕ್ ಕ್ಲೆವಿನ್ ಫೆರಾವೊಚಾ ಮುಖೆಲ್ಪಣಾಖಾಲ್ ವಿವಿಧ್ ಮನೋರಂಜನ್ ಖೆಳ್ ಚಲವ್ನ್ ವ್ಹೆಲೆಂ.

ಉಪ್ರಾಂತ್  ವೈ.ಸಿ.ಯಸ್ ಭುರ್ಗ್ಯಾಂನಿ ಪ್ರಾರ್ಥನ್ ಗೀತ್ ಗಾವ್ನ್ ವೆದಿ ಕಾರ್ಯೆಂ ಆರಂಭ್ ಕೆಲೆಂ. ವೆದಿರ್ ಅಮ್ಚ್ಯಾ ಫಿರ್ಗಜೆಚೆ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್, ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ರೋಶನ್ ಟೆಲ್ಲಿಸ್, ಕಾರ್ಯದರ್ಶಿ ಫಿಲೋಮಿನಾ ಡಿಸೋಜ, ಕೊವೆಂತಾಚಿ ವ್ಹಡಿಲ್ನ್ ಸಿ| ಲಿಲ್ಲಿ ಪಿಂಟೊ, 21 ಆಯೋಗ್ ಸಂಯೋಜಕ್ ವಿಕ್ಟರ್ ಕುಟಿನ್ಹೊ, ಸಂಪನ್ಮೂಳ್ ವ್ಯಕ್ತಿ  ಸಿ| ನ್ಯಾನ್ಸಿ ನೊರೊನ್ಹಾ, ಕುಟ್ಮಾಂ ಆಯೋಗ್ ಕಾರ್ಯದರ್ಶಿ ಸುನಿತಾ ಕುಟಿನ್ಹಾ, ವೈ.ಸಿ.ಯಸ್ ಸಚೇತಕ್ ಪ್ರೀತಮ್ ಡಿಸೋಜ, ಅಧ್ಯಕ್ಷ್ ರೋಹನ್ ಮೊಂತೇರೊ ಹಾಜರ್ ಆಸ್ಲಲಿ. ತಶೆಂಚ್ ಅಮ್ಚ್ಯಾ ಫಿರ್ಗಜೆಚಿ ಮಾಲ್ಗಡಿಂ ಹ್ಯಾ ಕಾರ್ಯಂತ್ ಹಾಜರ್ ಆಸ್ಲಲಿ. ಜಮ್ಲ್ಯಾ ಸಮೆಸ್ತಾಂಕ್  ವೈ.ಸಿ.ಯಸ್ ಅಧ್ಯಕ್ಷ್ ರೋಹನ್ ಮೊಂತೆರೊನ್ ಸ್ವಾಗತ್ ಕೆಲೊ. ಸಂಪನ್ಮೂಳ್ ವ್ಯಕ್ತಿ ಜಾವ್ನ್ ಹಾಜರ್ ಆಸ್ಲಲಿ ಸಿ| ನ್ಯಾನ್ಸಿ ನೊರೊನ್ಹಾನ್ ಅಪ್ಲ್ಯಾ ಶಿಕವ್ಣೆಂತ್ ಮಾಲ್ಗಡ್ಯಾಂಕ್ ಮಾನ್ ದಿಲ್ಯಾರ್ ದೆವಾಕ್ ಮಾನ್ ದಿಲ್ಲ್ಯಾ ಪರಿಂ. ದೆಕುನ್ ಆಮಿ ಮಾಲ್ಗಡ್ಯಾಂಕ್ ಮಾನ್ ದಿವ್ಯಾಂ ಮ್ಹಣ್ ಉಲೊ ದಿಲೊ.

ಫಿರ್ಗಜ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ರೋಶನ್ ಟೆಲ್ಲಿಸಾನ್ ಮಾಲ್ಗಡ್ಯಾಂಚ್ಯಾ ದಿಸಾಚೆ ಉಲ್ಲಾಸ್ ಪಾಟಯ್ಲೆಂ. ಉಪ್ರಾಂತ್ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾನ್ ರೊಡ್ರಿಗಸಾನಿಂ ಪಾಂಚ್ವೊ ಜಾಗಾತಿಕ್ ಆಬ್ ವ್ಹಡ್ಲಿ ಮಾಯ್ ಮಾಲ್ಗಡ್ಯಾಂಚೊ ಜುಬ್ಲೆವ್ ಆಚರಣ್ ಕರ್ಚೆ ಸಂದರ್ಭಿo ಸರ್ವ್ ಮಾಲ್ಗಡ್ಯಾಂಕ್ ಬರೆಂ ಮಾಗ್ಲೆಂ. ಕುಟ್ಮಾಂತ್ ಆನಿ ಸಮಾಜೆಂತ್ ಭರ್ವಸಾಚೊ ಮಹತ್ವ್ ಜಾಣಾಂ ಜಾಂವ್ಕ್ ಉಲೊ ದಿಲೊ. ಮಾಲ್ಗಡಿಂ ಘರಾಂತ್ ಮೊಲಾಧಿಕ್ ದಿರ್ವಿಂ ಜಾವ್ನಾಸಾತ್ ಆನಿ ಮಾಲ್ಗಡ್ಯಾಂಚಿ ದೇಖ್ ಅಮ್ಕಾಂ ಆದರ್ಶ್ ಮ್ಹಣ್ ಮಾಲ್ಗಡ್ಯಾಂ ವಿಶಿಂ ಹೊಗ್ಳಿಕ್ ಉಚಾರ್ಲಿ.

ಉಪ್ರಾಂತ್ ಫ್ರಿಡಾ ಡಿಸೋಜನ್ ಖೆಳಾಂತ್ ಜಿಕ್‌ಲ್ಲ್ಯಾಂಕ್ ಇನಾಮಾಂ ವಾಂಟ್ಚೆಂ ಕಾರ್ಯೆಂ ಚಲವ್ನ್ ವ್ಹೆಲೆಂ.  ವೈ.ಸಿ.ಯಸ್  ಕಾರ್ಯದರ್ಶಿ ಸಾವಿಯಾ ಪ್ರೀಶಲ್ ಡಿಸೋಜನ್ ಧನ್ಯವಾದ್ ಪಾಟಯ್ಲೆಂ. ಸ್ವಿಡಲ್ ಪ್ರೀಯಾ ಡಿಸೋಜನ್ ಕಾರ್ಯೆಂ ಚಲವ್ನ್ ವೆಲೆಂ. ಹೆಂ ಕಾರ್ಯೆಂ 9.45 ವರಾರ್ ಸಂಪ್ಲೆಂ. ಉಪ್ರಾಂತ್ ಸರ್ವ್ ಮಾಲ್ಗಡ್ಯಾಂಕ್ ಕಾಫಿ ಫಳಾರ್ ದಿಲೊ. ವೈ.ಸಿ.ಯಸ್ ಆನಿ ಕುಟ್ಮಾಂ ಆಯೋಗಾಚಾ ಸಾಂದ್ಯಾಂನಿ ಸಾಂಗಾತಾ ಮೆಳೊನ್ ಪ್ರಯೋಜಕ್ ಜಾವ್ನ್ ಕಾರ್ಯೆಂ ಚಲವ್ನ್ ವೆಲೆಂ.