ಮಾರ್ಚ್ 05, 2025

2025 ಮಾರ್ಚ್ ಮಹಿನ್ಯಾಚ್ಯಾ 5 ತಾರಿಕೆರ್ ಸಕಾಳಿಂ 7.00 ವರಾರ್ ಆನಿ ಸಾಂಜೆರ್ 5.00 ವರಾರ್ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್ ಹಾಣಿಂ ಪವಿತ್ರ್ ಮಿಸಾಚೆ ಬಲಿದಾನ್ ಭೆಟವ್ನ್ ಸರ್ವ್ ಫಿರ್ಗಜ್ಗಾರಾಂಕ್ ಸಿಂಜ್ ಫಾಲ್ನ್ ಪ್ರಾಚಿತ್ ಕಾಳ್ ಆರಂಭ್ ಕೆಲೊ. ಪ್ರಾಚಿತ್ ಕಾಳಾರ್ ಹರ್ಯೆಕಾ ದಿಸಾ ಸಾಂಜೆರ್ 5.00 ವರಾರ್ ತೇರ್ಸ್, ಖುರ್ಸಾವಾಟ್, ಆನಿ ಪವಿತ್ರ್ ಮಿಸಾಚೆ ಬಲಿದಾನ್ ವಾಡ್ಯಾವಾರ್ ತಶೆಂಚ್ ಹರ್ಯೆಕಾ ಸಂಘಟನಾಕ್ ವಾಂಟುನ್ ದೀವ್ನ್ ಅಪುರ್ಬಾಯನ್ ಚಲವ್ನ್ ವೆಲಿ. ಜುಬ್ಲೆವಾಚಾ ಹ್ಯಾ ಸಂಧರ್ಭಾರ್ ಜುಬ್ಲೆವಾಚೊ ಖುರಿಸ್ 3 ವಾಡ್ಯಾಂತ್ ವರ್ನ್ ಹರ್ಯೆಕಾ ದಿಸಾ ಸಾಂಜೆರ್ ವಾಡ್ಯಾಗಾರಾಂ ತಶೆಂಚ್ ಸೆಜಾರ್ಚಿ ಸಾಂಗಾತಾ ಮೆಳೊನ್ 3 ನೀ ವಾಡ್ಯಾಂತ್ ಖುರ್ಸಾ ವಾಟೆಚೆ ಭಕ್ತಿಪಣ್ ಚಲವ್ನ್ ವೆಲೆಂ.

ಭಾಗೆವಂತ್ ಹಫ್ತ್ಯಾoತ್  ಪವಿತ್ರ್ ಮಿಸಾಚೆ ಬಲಿದಾನ್ ಭೆಟಂವ್ಕ್ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸಾ ಸಾಂಗಾತಾ ಬಾಪ್ ಲ್ಯಾನ್ಸಿ ಫೆರ್ನಾoಡಿಸ್ ಹಾಜರ್ ಆಸಲ್ಲೆ. 

ನಿಮಾಣ್ಯಾ ಬ್ರೆಸ್ತರಾ ಯಾಜಕಾಂಚೊ ದೀಸ್ ಸಂಭ್ರಮ್ತಾಸ್ತಾನಾ, ವಿಗಾರ್ ತಶೆಂಚ್ ಬಾಪ್ ಲ್ಯಾನ್ಸಿ ಫೆರ್ನಾಂಡಿಸಾಕ್ ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷನ್  ಫುಲ್ ದೀವ್ನ್ ಸರ್ವ್ ಫಿರ್ಗಜ್ಗಾರಾಂ ತರ್ಫೆನ್ ಉಲ್ಲಾಸ್ ಪಾಟಯ್ಲೆಂ. ಸಾಂಚೆರ್ 6.00 ವರಾರ್ ನಿಮಾಣ್ಯಾ ಬ್ರೆಸ್ತಾರಾಚಿ ಸೆರೆಮನಿ ಚಲವ್ನ್ ವೆಲಿ. ಫಿರ್ಗಜ್ಗಾರಾಂ ಪಯ್ಕಿ 12 ಅಪೊಸ್ತಲಾಂಚೆಂ ಪಾಯ್ ಧುವ್ನ್ ಸೆವಾ ಕರ್ಚ್ಯಾಕ್ ಉಲೊ ದಿಲೊ. ತ್ಯಾ ದಿಸಾ ಪವಿತ್ರ್ ಸಾಕ್ರಾಮೆತಾಚೆ ಆರಾಧನ್ ಸಿ.ಲಿಲ್ಲಿ ಪಿಂಟೊ ಆನಿ ಸಾಂಗಾತ್ಯಾಂನಿ ಚಲವ್ನ್ ವೆಲೆಂ. 

ನಿಮಾಣ್ಯಾ ಸುಕ್ರಾರಾ ಸಕಾಳಿಂ 7.30 ವರಾರ್ ಉಗ್ರ್ಯಾ ಮೈದಾನಾರ್ ಜೆರಾಲ್ ಖುರ್ಸಾ ವಾಟ್ ಚಲಯ್ಲಿ. ಹರ್ಯೆಕಾ ಸ್ತೆಸಾಂವಾಂಕ್ ಫಿರ್ಗಜ್ ಕುಟ್ಮಾಚಾ ಸಾಂದ್ಯಾಂನಿ ತಶೆಂಚ್ ಸಂಘಟನಾಚಾ ಸಾಂದ್ಯಾಂನಿ ಖುರಿಸ್ ವಾವೊವ್ನ್ ಸಾಂಗಾತ್ ದಿಲೊ. ತಶೆಂಚ್ ನಮಿಯರ್ಲ್ಯಾ ವೆಳಾರ್ ಯೇವ್ನ್ ಮೌನ್ ಪಣಿo ಸಾಕ್ರಾಮೆತಾಚಾ ಭಕ್ತಿಪಣಾಂತ್ ವಾಂಟೊ ಘೆತ್ಲೊ. ಆನಿ ಸಾಂಜೆರ್ 4.00 ವರಾರ್ ನಿಮಾಣ್ಯಾ ಸುಕ್ರಾರಾಚಿ ಸೆರೆಮನಿ ಚಲವ್ನ್ ವೆಲಿ. 

ಸನ್ವರಾ ಸಾಂಜೆರ್ 7.00 ವರಾರ್ ಪಾಸ್ಕಾಚಾ ಫೆಸ್ತಾಚೆ ಸಂಭ್ರಮಿಕ್ ಮೀಸ್ ಭೆಟಯ್ಲೆ. ಮಿಸಾ ಉಪ್ರಾಂತ್ ಸರ್ವ್ ಫಿರ್ಗಜ್ ಗಾರ್ ಸಾಂಗಾತಾ ಮೆಳೊನ್ ಪಾಸ್ಕಾಚಾ ಫೆಸ್ತಾಚೆ ಜೆವಾಣ್ ಸೆವ್ಲ್ಯಾಂವ್.ಆಯ್ತಾರಾ ಸಕಾಳಿಂ 7.30 ವರಾರ್ ಪಾಸ್ಕಾಚಾ ಫೆಸ್ತಾಚಾ ಮಿಸಾಂತ್ ಫಿರ್ಗಜ್ಗಾರಾಂನಿ ವಾಂಟೊ ಘೆತ್ಲೊ. ಮಿಸಾ ಉಪ್ರಾಂತ್ ವಿಗಾರಾಚೆ ಘರ್ ಬೆಂಜಾರ್ ಕೆಲೆಂ. ಆನಿ ಸರ್ವ್ ಫಿರ್ಗಜ್ಗಾರಾಕ್ ಗೊವ್ಳಿಕ್ ಪರಿಷದೆಚಾ ಮುಖೆಲ್ಪಣಾಖಾಲ್ ಅದ್ಮೆತ್ ವಾಂಟ್ಲೆಂ.

            ದೇವ್ ಸ್ತುತಿ ಆಯೋಗಾಚಾ ಮುಖೆಲ್ಪಣಾಖಾಲ್ ಸಗ್ಳಿ ಮಾಂಡಾವಾಳ್ ಘಾಲ್ನ್, ತಾಳಿಯಾಂಚಾ ಆಯ್ತಾರಾ ಕ್ರೀಸ್ತ್ ರಾಯ್ ವಾಡ್ಯಾಗಾರಾಂನಿ, ನಿಮಾಣ್ಯಾ ಬ್ರೆಸ್ತಾರಾ ಭಾಗೆವಂತ್ ಕುಟ್ಮಾಂ ವಾಡ್ಯಾಗಾರಾಂನಿ, ನಿಮಾಣ್ಯಾ ಸುಕ್ರರಾ ಬಾಳಕ್ ಜೆಜು ವಾಡ್ಯಾಗಾರಾಂನಿ, ಪಾಸ್ಕಾಚಾ ಫೆಸ್ತಾಕ್ ಫಿರ್ಗಜ್ಗಾರಾಂನಿ ದೇವ್ ಸ್ತುತಿ  ಚಲವ್ನ್ ವೆಲಿ