ಆಗಸ್ಟ್  15, 2025

ಆಗಸ್ಟ್ ಮಹಿನ್ಯಾಚಾ 15 ತಾರಿಕೆರ್ ಸುಕ್ರಾರಾ ಮರಿಯೆಚೆ ಸ್ವರ್ಗಾವ್ಹರಣ್ ಫೆಸ್ತ್ ಆನಿ ಸ್ವಾತಂತ್ರ್ಯೋತ್ಸವ್ ಸಂಭ್ರಮ್ ಸಕಾಳಿಂಚಾ 7.00 ವೊರಾಂಚಾ ಮಿಸಾಚಾ ಬಲಿದಾನಾ ಸವೆಂ ಸುರ್ವಾತ್ ಕೆಲೊ. ಫಿರ್ಗಜ್ ವಿಗಾರ್  ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್ ಹಾಣಿಂ ಪವಿತ್ರ್  ಮಿಸಾಚೆಂ  ಬಲಿದಾನ್ ಭೆಟಯ್ಲೆಂ ಆನಿ ಮರಿಯೆ ಮಾಯೆನ್ ತಿಚ್ಯಾ ಜಿವಿತಾಂತ್ ಸುರ್ವೆರ್ ಥಾವ್ನ್ ಆಕೇರ್ ಪರ್ಯಾಂತ್ ದೆವಾಚಾ ಉತ್ರಾಕ್ ಖಾಲ್ತಿ ಜಾಲಿ.  ಆಮಿಯ್ ಮರಿಯೆಚೆಂ ಆದರ್ಶ್ ಘೆವ್ನ್  ಜಿಯೆಂವ್ಯಾ ಮ್ಹಣ್ ಭೋವ್ ಅರ್ಥಾಭರಿತ್ ರಿತಿನ್ ದೆವಾಚೆ ಉತ್ರಾ ವಯ್ರ್ ಪ್ರವಚನ್ ದಿಲೆಂ. ಸ್ತ್ರೀಯಾಂನಿ  ಭೋವ್ ಅಪುರ್ಬಾಯೆನ್ ದೇವ್ ಸ್ತುತಿ  ಚಲವ್ನ್ ವ್ಹೆಲಿ.

ಮಿಸಾ ಉಪ್ರಾಂತ್ 8.15 ವೊರಾರ್ ಸರ್ವ್ ಫಿರ್ಗಜ್'ಗಾರಾಂ ಇಗರ್ಜೆಚಾ ಮೈದಾನಾರ್ ಆಮ್ಚ್ಯಾ ಭಾರತ್ ದೇಶಾಕ್ ಲಾಭ್ಲೆಲ್ಯಾ ಸ್ವಾತಂತ್ರೋತ್ಸವ್ ಸಂಭ್ರಮಾಕ್ ಸಾಂಗಾತಾ ಜಮ್ಲ್ಯಾಂವ್. ಹ್ಯಾ ಕಾರ್ಯಂತ್ ಫಿರ್ಗಜ್ ವಿಗಾರ್  ಬಾಪ್ ಸ್ಟಾನಿಸ್ಲಾಸ್ ರೊಡ್ರಿಗಸ್,  ಗೊವ್ಳಿಕ್ ಪರಿಷಧ್ ಉಪಾಧ್ಯಕ್ಷ್ ಮಾನೆಸ್ತ್ ರೋಶನ್ ಟೆಲ್ಲಿಸ್,  ಕಾರ್ಯದರ್ಶಿ ಮಾನೆಸ್ತಿಣ್ ಫಿಲೋಮಿನಾ ಡಿಸೋಜ, ಕೊವೆಂತಾಚಿ ವ್ಹಡಿಲ್ನ್ ಸಿ| ಲಿಲ್ಲಿ ಪಿಂಟೊ, ಆನಿ 3 ವಾಡ್ಯಾಚೆ ಗುರ್ಕಾರ್ ಕ್ಷೇವಿಯರ್ ಫೆರಾವೊ, ಎವರೆಸ್ಟ್ ಮೊಂತೇರೊ, ಪೀಟರ್ ಡಿಸೋಜ ಹಾಜರ್ ಆಸ್ಲಲೆ.

 ಸ್ತ್ರೀ ಸಂಘಟನಾಚಾ ಸಾಂದ್ಯಾಚ್ಯಾ ಮುಖೆಲ್ಪಣಾಖಾಲ್ ವಂದೇ ಮಾತರಂ ಗಿತಾಂ ಸವೆಂ ಭಾರತ್ ಮಾತೆಕ್ ಆಮಿ ಸರ್ವಾಂನಿ ವಂದಿಲೆಂ. ಉಪ್ರಾಂತ್ ಮುಖೆಲ್ ಸಯ್ರಿ ಜಾವ್ನ್ ಸಿ| ಲಿಲ್ಲಿ ಪಿಂಟೊ ಹಿಣೆಂ  ಧ್ವಜಾರೋಹಣ್ ಕಾರ್ಯಕ್ರಮ್ ಚಲವ್ನ್ ವ್ಹೆಲೆಂ. ಹ್ಯಾ ವೆಳಾರ್ ರಾಷ್ಟ್ರ್ ಗೀತ್ ಗಾವ್ನ್ ಆಮ್ಚ್ಯಾ ರಾಷ್ಟ್ರ ಧ್ವಜಾಕ್ ಮಾನ್ ಕೆಲೊ. ಸಿ| ಲಿಲ್ಲಿ ಪಿಂಟೊ ಆನಿ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸಾನಿಂ ಸ್ವಾತಂತ್ರೋತ್ಸವಾ ವಿಶಿಂ ಸಂದೇಶ್ ದಿಲೊ ಆನಿ ಉಪಾಧ್ಯಕ್ಷ್ ರೋಶನ್ ಟೆಲ್ಲಿಸಾನ್ ಭಾಗಿ ದಿಸಾಚೆ ಉಲ್ಲಾಸ್ ಪಾಟಯ್ಲೆ.

ಕಥೊಲಿಕ್ ಸಭಾ ಅಧ್ಯಕ್ಷ್ ಸಿಪ್ರಿಯನ್ ಮೊಂತೇರೊನ್ ಸರ್ವಾಂಕ್ ಸ್ವಾಗತ್ ಕೆಲೊ. ಆಯೋಗಾಚೊ ಸಾಂದೊ ಫ್ರಾನ್ಸಿಸ್ ಡಿಸೋಜನ್  ಸರ್ವಾಂಚೊ ಉಪ್ಕಾರ್ ಭಾವುಡ್ಲೊ. ಲಾಯಿಕ್ ಅಪಸ್ತಲಾದಿಕ್ ಆಯೋಗ್ ಆನಿ ಕಥೊಲಿಕ್ ಸಭಾಚೊ ಕಾರ್ಯದರ್ಶಿ ಸಿರಿಲ್ ಫೆರಾವೊನ್ ಭೋವ್ ಅಪುರ್ಬಾಯೆನ್ ಕಾರ್ಯೆಂ ನಿರ್ವಾಹಣ್ ಕೆಲೆಂ. ಉಪ್ರಾಂತ್ ಗೊಡ್ಶೆಂ ದೀವ್ನ್ ಸರ್ವಾಂಕಿ ದಾಧೊಶಿ ಕೆಲೆಂ.