ಜನವರಿ 12, 2025

ಕ್ರೀಸ್ತ್ ರಾಯ್ ಫಿರ್ಗಜೆಂತ್ ಬಾಳೊಕ್ ಜೆಜುಕ್ ಸಮರ್ಪಿಲ್ಲ್ಯಾ ವಾಡ್ಯಾಗಾರಾಂನಿ ಪಾತ್ರೊನ್ ಬಾಳೊಕ್ ಜೆಜುಕ್ ಮಾನ್  ಕರ್ನ್ 2025 ಜನವರಿಚಾ 12 ತಾರಿಕೆರ್ ವಾಡ್ಯಾಚೆ ಫೆಸ್ತ್ ಆಚರಣ್ ಕೆಲೆಂ. ಸಕಾಳಿಂ ಬಾಳೊಕ್ ಜೆಜುಕ್ ಮಾನ್ ಕರ್ನ್ ಮಿಸಾಚೆಂ ಬಲಿದಾನ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್ ಬಾಪಾಂನಿ ಭೆಟಯ್ಲೆಂ. ವಾಡ್ಯಾಗಾರಾಂನಿ ಅಪುರ್ಬಾಯೆನ್ ದೇವ್ ಸ್ತುತಿ ಚಲವ್ನ್  ವ್ಹೆಲಿಂ. 

ಸಾಂಜೆರ್ 4. 30 ವರಾರ್ ಬಾಳಕ್ ಜೆಜುಕ್ ಮಾನ್ ಕರ್ನ್ ಅಲ್ಬರ್ಟ್ ಮೊಂತೇರೊ ಮಲ್ಲಿಪ್ಪಾಡಿ ಹಾಂಚಾ ಘರಾ ವಾಡ್ಯಾ ಫೆಸ್ತ್ ಆಚರಣ್ ಕೆಲೆಂ. ಹ್ಯಾ ಕಾರ್ಯಾಂತ್ ವಾಡ್ಯಾಚಾ 57 ಜಣಾಂನಿ ವಾಂಟೊ ಘೆತ್ಲಾ. ಶೈಲಾ ಡಿ ಸೋಜನ್ ಮಾಗ್ಣ್ಯಾಂ ವಿಧಿಂ ಚಲವ್ನ್ ವ್ಹೆಲಿಂ. ಉಪ್ರಾಂತ್ ಸರ್ವಾಂಕ್ ಮಾಲ್ಟ್ ಆನಿ ತಿಂಡಿ ವಾಂಟ್ಲಿಂ. ವಾಡ್ಯಾಗಾರಾಂಕ್ ಮನೋರಂಜನ್ ಕರ್ಚ್ಯಾಕ್ ಶಾಹಿಶ್ ಮೊಂತೇರೊ ಆನಿ ಸಾಂಗಾತ್ಯಾನಿ ಖೆಳ್ ಚಲವ್ನ್ ವ್ಹೆಲೆಂ. ಉಪ್ರಾಂತ್ ವಾಡ್ಯಾಗಾರಾಂನಿ ಆಧ್ಯಾತ್ಮಿಕ್ ಸಂಬಂಧಿತ್ ಜಾವ್ನ್ ಭೋವ್ ಅಪುರ್ಬಾಯೆಚೆ ಸಾಂಸ್ಕೃತಿಕ್ ಕಾರ್ಯೆಂ  ಮಾಂಡುನ್ ಹಾಡ್ಲೆಂ. ಹೆಂ ಕಾರ್ಯೆಂ ವಿನಿಶಾ ಡಿ ಸೋಜನ್ ಚಲವ್ನ್ ವ್ಹೆಲೆಂ. ವಿವಿಧ್ ಸಾಂತಾಚಿ ನಕ್ಲಿ ನೆಸ್ಣಾಂ ಮುಖಾಂತ್ರ್ ಆಮ್ಚಿಂ ಭುರ್ಗಿಂ ಆಯ್ತಿಂ ಜಾವ್ನ್ ಸಾಂತಾಚಾ ಜಿಣ್ಯೆವಿಶಿಂ ಅಂಬ್ರೋಜ್ ಮೊಂತೇರೊ ಆನಿ ಫಿಲೋಮಿನಾ ಡಿ ಸೋಜನ್ ಮಾಹೆತ್ ದಿಲಿಂ. ಹೆಂ ವರ್ವಿಂ  ಹರ್ಯೆಕಾ ಸಾಂತಾವಿಶಿಂ ಸಮ್ಜವ್ಕ್ ಸಾಧ್ಯ್ ಜಾಲೆಂ.  ಅಮ್ಚ್ಯಾ ವಾಡ್ಯಾಂತ್ ಸೆವಾ ದಿಂವ್ಚ್ಯಾಕ್ ಕಾರ್ಯದರ್ಶಿ ಆನಿ ದೇವ್ ಸ್ತುತಿ ಕಾರ್ಯದರ್ಶಿಚೆ ವಿಂಚವ್ಣ್ ಕರ್ತಾಸ್ತಾನಾ ಕಾರ್ಯದರ್ಶಿ ಜಾವ್ನ್ ಅಂಬ್ರೋಜ್ ಮೊಂತೇರೊ ಆನಿ ದೇವ್ ಸ್ತುತಿ ಕಾರ್ಯದರ್ಶಿ ಜಾವ್ನ್ ಪ್ರಿಯಾ ಡಿ ಸೋಜ ವಿಂಚವ್ಣ್ ಆಯ್ಲಿ. ವಿಗಾರ್  ಬಾಪಾನಿ ಹೆಂ ಕಾರ್ಯೆಂ ಚಲವ್ನ್ ವ್ಹೆಲೆಂ.  

ಉಪ್ರಾಂತ್ ವೆದಿ ಕಾರ್ಯೆಂ ಪ್ರೀಯಾ ಡಿ ಸೋಜನ್ ಚಲವ್ನ್ ವ್ಹೆಲೆಂ. ವೆದಿರ್ ವಿಗಾರ್ ಬಾಪ್ ಸ್ಟ್ಯಾನಿಸ್ಲಾಸ್ ರೊಡ್ರಿಗಸ್, ಉಪಾಧ್ಯಕ್ಷ್ ರೋಶನ್ ಟೆಲ್ಲಿಸ್ , ಕಾರ್ಯದರ್ಶಿ ಫಿಲೋಮಿನಾ ಡಿ ಸೋಜ, ಗುರ್ಕಾರ್ ಪೀಟರ್ ಡಿ ಸೋಜ, ಪ್ರತಿನಿಧಿ ಲಿಯೋ ಡಿ ಸೋಜ ಆನಿ ಲೀನಾ ಡಿ ಸೋಜ, ಲ್ಹಾನ್ ಕ್ರೀಸ್ತಾಂವ್ ಸಮುದಾಯ್ ಸಂಚಾಲಕ್ ಜೇಮ್ಸ್ ಟೆಲ್ಲಿಸ್ ಹಾಜರ್ ಆಸ್ಲೆಂ. ಹ್ಯಾ ಕಾರ್ಯಾಕ್ ಕ್ರೀಸ್ತ್ ರಾಯ್ ವಾಡ್ಯಾಚೊ ಗುರ್ಕಾರ್ ಕ್ಸೇವಿಯರ್ ಫೆರಾವೊ, ಭಾಗೆವಂತ್ ಕುಟ್ಮಾ ವಾಡ್ಯಾಚೊ ಗುರ್ಕಾರ್ ಎವರೆಸ್ಟ್ ಮೊಂತೇರೊ ತಶೆಂಚ್ ಫಿರ್ಗಜ್ ಗೊವ್ಳಿಕ್ ಪರಿಷದೆಚೆ ಸಾಂದೆ ಹಾಜರ್ ಆಸ್ಲೆಂ. ಕಾರ್ಯಕ್ ಹಾಜರ್ ಜಾಲ್ಲ್ಯಾಂಕ್ ವಾಡ್ಯಾಚೊ ಗುರ್ಕಾರ್ ಪೀಟರ್ ಡಿ ಸೋಜನ್ ಸ್ವಾಗತ್ ಕೆಲೊ. ಸರ್ವ್ ಮಾನಾಚಾ ಸಯ್ರ್ಯಾಂಕ್ ವಾಡ್ಯಾಚಾ ಭುರ್ಗ್ಯಾಂನಿ ಫುಲ್ ದೀವ್ನ್ ಸ್ವಾಗತ್ ಕೆಲೊ.

ಬಾಳಕ್ ಜೆಜು ವಾಡ್ಯಾಚಿ 2024-25 ವ್ಯಾ ವರ್ಸಾಚಿ ವಾರ್ಷಿಕ್ ವರ್ದಿ ಕಾರ್ಯದರ್ಶಿ ಲಿಯೋ ಡಿ ಸೋಜನ್ ವಾಚ್ಲಿ. ಗೊವ್ಳಿಕ್ ಪರಿಷದ್ ಉಪಾಧ್ಯಕ್ಷ್ ರೋಶನ್ ಟೆಲ್ಲಿಸಾನ್ ಆಪ್ಲ್ಯಾ ಸಂದೇಶಾಂತ್ ವಾಡ್ಯಾ ಫೆಸ್ತಾಕ್ ಸರ್ವ್ ಬರೆಂ ಮಾಗ್ಲೆಂ. ಖೆಳಾ ಸ್ಪರ್ಧ್ಯಾಂತ್ ಜಿಕ್ಲೆಲ್ಯಾಂಚೆ ನಾಂವಾಂ ಶಾಹಿಶ್ ಮೊಂತೇರೊನ್ ವಾಚ್ಲಿ  ಆನಿ ಇನಾಮಾಂ ವಾಂಟ್ಚೆಂ ಕಾರ್ಯೆಂ ಚಲವ್ನ್ ವ್ಹೆಲೆಂ. ವಾಡ್ಯಾಂತ್ ಎದೊಳ್ ಪರ್ಯಾಂತ್ ಕಾರ್ಯದರ್ಶಿ ಜಾವ್ನ್ ಸೆವಾ  ದಿಲ್ಲ್ಯಾ  ಲಿಯೋ ಡಿ ಸೋಜ ಆನಿ ದೇವ್ ಸ್ತುತಿ ಕಾರ್ಯದರ್ಶಿ ಶ್ವೇತಾ ಮೊಂತೇರೊಚೊ ಉಪ್ಕಾರ್ ಭಾವುಡ್ಲೊ. ತಶೆಂಚ್ ನವ್ಯಾನ್ ಚುನಾಯಿತ್ ಜಾಲ್ಲ್ಯಾ ವಾಡ್ಯಾಚೊ ಕಾರ್ಯದರ್ಶಿ ಅಂಬ್ರೋಜ್ ಮೊಂತೇರೊ ಆನಿ ದೇವ್ ಸ್ತುತಿ ಕಾರ್ಯದರ್ಶಿ ಪ್ರೀಯಾ ಡಿ ಸೋಜಕ್ ಉಲ್ಲಾಸ್ ಪಾಟವ್ನ್ ಮುಖ್ಲ್ಯಾ ಸರ್ವ್ ವಾವ್ರಾಕ್ ಫಿಲೋಮಿನಾ ಡಿ ಸೋಜನ್ ಬರೆಂ ಮಾಗ್ಲೆಂ. 

ವಿಗಾರ್ ಬಾಪಾನಿ ಅಪ್ಲ್ಯಾ ಸಂದೇಶಾಂತ್ ವಾಡ್ಯಾ ಫೆಸ್ತಾಚೆ ಉಲ್ಲಾಸ್ ಪಾಟವ್ನ್ ಅಪುರ್ಬಾಯೆಚೆ ಕಾರ್ಯೆಂ ಮಾಂಡುನ್ ಹಾಡ್ಲ್ಯಾ ಮ್ಹಣ್ ಶಾಭಾಸ್ಕಿ ಉಚಾರ್ಲಿ. ಮುಖ್ಲ್ಯಾ ವಾವ್ರಾಕ್ ಸರ್ವ್ ಬರೆಂ ಮಾಗ್ಲೆಂ. ಕಾರ್ಯಚಾ ಅಕ್ರೇಕ್ ಕಾರ್ಯದರ್ಶಿ ತಶೆಂಚ್ ವಾಡ್ಯಾಚೊ ಪ್ರತಿನಿಧಿ ಲಿಯೋ ಡಿ ಸೋಜನ್ ಧನ್ಯವಾದ್ ಪಾಟಯ್ಲೆಂ. ಉಪ್ರಾಂತ್ ವಾಡ್ಯಾಗಾರಾಂನಿ ಕುಟ್ಮಾಂತ್ ತಯಾರ್ ಕರ್ನ್ ಹಾಡ್ಲೆಂ ವಿವಿಧ್ ನಮುನ್ಯಾಚೆ ರಾಂದಾಪ್ ಸರ್ವ್ ವಾಡ್ಯಾಗಾರಾಂನಿ ಸಾಂಗಾತಾ ಮೆಳೊನ್ ಸೇವ್ನ್ ವಾಡ್ಯಾಂತ್ ಭಾವ್  ಬಾಂಧವ್ಪಣಾಂತ್ ವಾಂಟೊ ಘೆತ್ಲೊ. ಅಶೆಂ ವಾಡ್ಯಾ ಫೆಸ್ತ್ ಭೋವ್ ಅಪುರ್ಬಾಯೆನ್ ಆಚರಣ್ ಕೆಲೆಂ. ದೇವ್ ಬರೆಂ ಕರುಂ.