ಸಪ್ತೆಂಬರ್ 8, 2024

ಸಪ್ತೆಂಬರ್ ಮಹಿನ್ಯಾಚಾ  8 ತಾರಿಕೆರ್ ಕ್ರೀಸ್ತ್ ರಾಯಾಕ್ ಸಮರ್ಪಿಲ್ಲ್ಯಾ  ಮನೆಲಾ ಫಿರ್ಗಜೆಂತ್ ಮೊಂತಿ ಫೆಸ್ತ್, ಕುಟ್ಮಾಚೆಂ ಫೆಸ್ತ್ ವ್ಹಡಾ ಭಕ್ತಿಪಣಾನ್ ಆನಿ ಸಂಭ್ರಮಾನ್ ಆಚರಣ್ ಕೆಲೆಂ. 9 ದಿಸಾಚೆಂ ನೊವೆನ್ ಕರ್ನ್ ಸಕಾಳಿಂ 7.30 ವರಾರ್ ಮರಿಯೆಚಾ ಗ್ರೊಟ್ಯಾಲಾಗಿಂ ನವೆಂ ಆಶೀರ್ವಚನ್ ಕರ್ನ್ ಬಾಳಕ್ ಮರಿಯೆಕ್ ಫುಲಾಂ ಅರ್ಪುನ್ ಮಾನ್ ಕೆಲೊ. ಉಪ್ರಾಂತ್ ಪುರ್ಶ್ಯಾಂವಾರ್ ವಚೊನ್ ಇಗರ್ಜೆಂತ್ ಫೆಸ್ತಾಚೆ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ.

ಫಿರ್ಗಜ್ ವಿಗಾರ್ ಮಾ| ಬಾಪ್ ಸ್ಟ್ಯಾನಿ ರೊಡ್ರಿಗಸ್ ಸಂಗಿಂ ಸಯ್ರೆ ಯಾಜಕ್ ಜಾವ್ನ್ ಜೆಪ್ಪು ಸಾಂ.ಜುಜೆ ಸೆಮಿನಾರಿಚೆ ಆತ್ಮಿಕ್ ದಿರೊಕ್ತೊರ್  ಮಾ| ಬಾಪ್ ವಿನ್ಸೆಂಟ್ ಅನಿಲ್ ಮಿನೆಜಸ್ ಹಾಣಿಂ ಪ್ರದಾನ್ ಯಾಜಕ್ ಜಾವ್ನ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ ಆನಿ ಮರಿಯೆಲಾಗಿಂ ಮಾಗ್ಯಾಂ, ಮರಿಯೆಪರಿಂ ಮಾಗ್ಯಾಂ, ಮರಿಯೆಪರಿಂ ಜಾವ್ಯಾಂ ಮ್ಹಳ್ಳೊ ಅಪುರ್ಬಾಯೆಚೊ ಸಂದೇಶ್ ದಿಲೊ. ವೈ.ಸಿ.ಯಸ್ ಆನಿ ಐ.ಸಿ.ವೈ.ಯಂ ಚ್ಯಾ ಸಾಂದ್ಯಾಂನಿ ಅಪುರ್ಬಾಯೆನ್ ದೇವ್‍ಸ್ತುತಿ ಚಲವ್ನ್ ವ್ಹೆಲಿಂ. ಫಿರ್ಗಜ್‍ಗಾರಾಂನಿ ವ್ಹಡಾ ಸಂಖ್ಯಾನ್ ಭಕ್ತಿಪಣಾನ್ ಫೆಸ್ತಾಚಾ ಮಿಸಾಂತ್ ವಾಂಟೊ ಘೆತ್ಲೊ. ಫೆಸ್ತಾಕ್ ಮುಡ್ದೊಮ್ ಆನಿ ಪ್ರಯೋಜಕ್ ಜಾಲ್ಲ್ಯಾಂಕ್ ವಾತಿ ವಾಂಟುನ್ ಮಾನ್ ಕೆಲೊ. ಗೊವ್ಳಿಕ್ ಪರಿಷದೆಚಾ ಸಾಂದ್ಯಾಂನಿ ಫಿರ್ಗಜ್‍ಗಾರಾಂಕ್ ಬೆಂಜಾರ್ ಕೆಲ್ಲ್ಯೊ ಕಣ್ಶೊಂ ವಾಂಟ್ಲ್ಯೊ.

ಮನೆಲಾ ಕ್ರೀಸ್ತ್ ರಾಯ್  ಫಿರ್ಗಜೆಚೆಂ  ಅಧಿಕೃತ್ ವೆಬ್‍ಸೈಟ್  ಮೊಂತಿ ಫೆಸ್ತಾಚಾ ಸಂಭ್ರಮಿಕ್ ಮಿಸಾ ಉಪ್ರಾಂತ್ ಸಾಮಾಜಿಕ್ ಸಂಪರ್ಕ್ ಆಯೋಗಾಚಾ ಮುಖೆಲ್ಪಣಾಖಾಲ್ ಗೊವ್ಳಿಕ್ ಪರಿಷದೆಚ್ಯಾ ಸಹಕಾರನ್ ಫಿರ್ಗಜ್ ವಿಗಾರ್ ಬಾಪ್  ಸ್ಟ್ಯಾನಿ ರೊಡ್ರಿಗಸ್ ಹಾಣಿಂ ಉಗ್ತಾವಣ್ ಕೆಲೆಂ. ಬಾಪ್ ವಿನ್ಸೆಂಟ್ ಅನಿಲ್ ಮಿನೆಜಸ್  ಹಾಣಿಂ ಸಾಂಗಾತ್ ದಿಲೊ. ಹ್ಯಾ ವೆಬ್‍ಸೈಟಾರ್ ಫಿರ್ಗಜೆಚೆಂ ಚರಿತ್ರಾ ಆನಿ ಫಿರ್ಗಜೆಕ್ ಸಂಬಂಧ್ ಜಾಲ್ಲಿ ಮಾಹೆತ್ ಅಟಾಪುನ್ ಆಸ್ತಲಿ. ಕಥೊಲಿಕ್ ಸಭಾ ಮನೆಲಾ ಘಟಕಾಚ್ಯಾ ತರ್ಫೆನ್ 10 ಜಣಾಂ ಭುರ್ಗ್ಯಾಂಕ್  ಪ್ರತಿಭಾ ಪುರಾಸ್ಕಾರ್ ಕಾರ್ಯೆಂ ಚಲವ್ನ್ ವ್ಹೆಲೆಂ. ಮಿಸಾಂ ಉಪ್ರಾಂತ್ ಸರ್ವ್ ಫಿರ್ಗಜ್‍ಗಾರಾಂಕ್  ವೊರ್ನ್ ಸ್ತ್ರೀ ಸಂಘಟನಾಚಾ ಸಾಂದ್ಯಾಂನಿ ತಶೆಂಚ್ ಕೊಬು ಕಥೊಲಿಕ್ ಸಭಾಚಾ ಸಾಂದ್ಯಾಂನಿ ವಾಂಟ್ಲೊ. ಅಶೆಂ ಮೊಂತಿ ಫೆಸ್ತ್ ವ್ಹಡಾ ದಬಾಜಾನ್ ಆಚರಣ್ ಕೆಲೆಂ.