ಅಕ್ತೋಬರ್ 12, 2024

ಕ್ರೀಸ್ತ್ ರಾಯಕ್ ಸಮರ್ಪಿಲ್ಲ್ಯಾ ಮನೆಲಾ ಫಿರ್ಗಜೆಂತ್ ಬಾಳೊಕ್ ಜೆಜು ವಾಡ್ಯಾಂತ್ ಫೆಲಿಕ್ಸ್ ಡಿ ಸೋಜ ಆನಿ ದೆವಾಧಿನ್ ಜೊಸ್ಪಿನ್  ಡಿ ಸೋಜ ಹಾಂಚಿ ಧುವ್ ಸಿಸ್ಟರ್ ಪ್ರಮಿಳಾ ಡಿ ಸೋಜ ಜೆಜುಚಾ ಮಿಸಾವಾಂತ್ ವಾಂಟೆಲಿ ಜಾಂವ್ಕ್ ಮನೆಲಾ ಫಿರ್ಗಜೆ ಥಾವ್ನ್ ವಿಂಚುನ್ ಕಾಡ್ಲಿ ಪಯ್ಲಿಂ ಧರ್ಮ್ ಭಯ್ಣ್ ಜಾವ್ನಾಸಾ. ದೆಕುನ್ ಫಿರ್ಗಜ್ಗಾರಾಂಕ್ ವರ್ತೊ ಸಂತೊಸ್ ಭೊಗ್ತಾ ಆನಿ ತಿಕಾ ಉಲ್ಲಾಸ್ ಪಾಠಯ್ತಾಂವ್.

ದೆವಾಚೆ ಅಪೊವ್ಣೆಂ ಜಾವ್ನಾಸಾ ಏಕ್ ವಿಶೇಸ್ ದೆಣೆಂ. ದೇವ್ ಸಬಾರಾಂಕ್ ಅಪಯ್ತಾ ಪುಣ್ ವಿಂಚುನ್ ಕಾಡ್ಚೆಂ ಥೊಡ್ಯಾಂಕ್‍ಚ್. ಸಿಸ್ಟರ್ ಪ್ರಮಿಳಾನ್ ದೆವಾಚಾ ತಾಳ್ಯಾಕ್ ಉಲೊ ದೀವ್ನ್ ರೊಜಾರ್ ಮಾಯೆಚ್ಯಾ ಮೆಳಾಕ್ ಭರ್ತಿ ಜಾವ್ನ್, ಹ್ಯಾಚ್ ಅಕ್ತೋಬರಾಚಾ 7 ತಾರೀಕೆರ್ ಆಪ್ಲಿ ಶಾಶ್ವತ್ ಆಂಗೊವ್ಣ್ ಕರ್ನ್, ಆಪ್ಲ್ಯಾ ಮಾಂಯ್ ಗಾಂವ್ ಜಾವ್ನಾಸ್ಚ್ಯಾ ಮನೆಲಾ ಕ್ರೀಸ್ತ್ ರಾಯಕ್ ಸಮರ್ಪಿಲ್ಲ್ಯಾ ಫಿರ್ಗಜೆಂತ್ ಅಕ್ತೋಬರಾಚಾ 12 ತಾರೀಕೆರ್ ಅರ್ಗಾಂ ಮೀಸ್ ಭೆಟಯ್ಲೆಂ. ಸಬಾರ್ ಯಾಜಕ್ ಆನಿ ಧರ್ಮ್ ಭಯ್ಣಿಂ ಥಂಯ್ಸರ್ ಹಾಜರ್ ಆಸ್‍ಲ್ಲಿಂ. ಮಿಸಾ ಉಪ್ರಾಂತ್ ಭೋವ್ ಅಪುರ್ಬಾಯೆಚೆಂ ವೆದಿ ಕಾರ್ಯೆಂ ಮಾಂಡುನ್ ಹಾಡ್ಲೆಂ.

ಆಮ್ಚ್ಯಾ ಫಿರ್ಗಜೆಂತ್ ಮುಖ್ಲ್ಯಾ ದಿಸಾಂನಿ ಚಡ್ ಆನಿ ಚಡ್ ದೇವ್ ಅಪೊವ್ಣೆಂ ಫುಲೊನ್ ಯೆಂವ್ದಿತ್ ಮ್ಹಣ್ ಆಶೆತಾಂವ್. ಸಿಸ್ಟರ್ ಪ್ರಮಿಳಾನ್ ಕೆಲ್ಲಿಂ ಶಾಶ್ವತ್ ಆಂಗೊವ್ಣ್ ಜಿಣ್ಯೆಚಾ ಆಕೇರ್ ಪರ್ಯಾಂತ್ ಪಾಳುಂಕ್ ದೇವ್ ತಿಕಾ ಬಳ್ ಆನಿ ಕುರ್ಪಾ ದೀಂವ್ ಮ್ಹಣ್ ಆಮ್ಚೆಂ ಮಾಗ್ಣೆಂ ಜಾವ್ನ್ ಆಸಾ ಆನಿ ಕ್ರೀಸ್ತ್ ರಾಯಾಚಿ ವಿಂಚ್ಣಾರ್ ಆಶೀರ್ವಾದಾಂ ತಿಚೆರ್ ಮಾಗ್ತಾಂವ್. 

ದೇವ್‍ಪ್ರಜಾ

ಕ್ರೀಸ್ತ್ ರಾಯ್ ಫಿರ್ಗಜ್ ಮನೆಲಾ